Предлог-законот за употреба на јазиците е последното легалистичко прашање со кое се затвораат отворените прашања од Рамковниот договор, кој е преточен и во Уставот, изјави денеска премиерот Зоран Заев.
– Читајќи го Охридскиот рамковен договор којшто е преточен и во Уставот на РМ, ова е последното легалистичко прашање што е во форма на закон, се затвора. Затоа кога одите по затворањето на отворените прашања по Охридскиот договор, ние официјално стоиме како Влада дека е последно отворено прашање. Но, Охридскиот договор има дух. Тој дух меѓу другото вели рамномерна застапеност на граѓаните во сите институции, дури и во приватниот сектор и насекаде, рече Заев одговарајќи на новинарско прашање „дали има гаранции од коалициските партнери од ДУИ и од Алијансата за Албанците дека ова навистина е последното отворено прашање“.
Во Собранието денеска почна дебатата по Предлог законот за употреба на јазиците. Тој е доставен со европско знаменце и за него расправаше Комисијата за европски прашања.
Пратениците од ВМРО ДПМНЕ побара од него да се тргне европското знаменце, бидејќи како што истакнаа денеска на Комисијата законот нема врска со европската агенда, и со тоа власта „сака да протурка противуставен закон набрзина“.
Од Кабинетот на видепремиерот за европски прашања Бујар Османи одговорија дека законот е поврзан со Рамковниот договор, а тој пак е поврзан со евроинтеграциите.