Портпаролот на грчката Влада Димитрис Ѕанакопулос на денешниот брифинг оцени дека преговорите за името продолжуваат со интензивен ритам.
-Можам јасно да кажам дека во овој момент чекориме по еден доста позитивен пат, изјавил тој, пренесува МИА.
Ѕанакопулос исто така рекол дека нацрт спогодбата ја разработува грчкото МНР, а набрзо е планирана посета на шефот на дипломатијата Никос Коѕијас на Скопје. Сепак, тој не го откри конкретниот датум, велејќи дека тоа ќе го соопшти грчкото МНР.
– Позицијата на грчката влада е сложено име, ерга омнес, за севкупна употреба. Што значи тоа? Дека е потребна уставна ревизија за да можеме да стигнеме до заемно прифатливо и одржливо решение. Уставната ревизија ќе се однесува и на името, но веројатно и на иредентистичките позиции што се вклучени во Уставот на соседот. Но, ова се прашања што ќе се решат за време на преговорите, преговори кои јасно е дека ќе завршат со еден Меѓународен договор, бидејќи говориме за договор меѓу две независни држави, рече портпаролот на грчката Влада.
Ѕанакопулос, на денешниот брифинг, упати остри критики до лидерот на опозициската Нова демократија, Киријакос Мицотакис, меѓу другото и за ставовите за прашањето за името. Смета дека изразените ставови при вчерашниот говор во Центарот за стратешки и меѓународни студии во Вашингтон се различни и контрадикторни од оние што Мицотакис ги има во Грција.
Лидерот на грчката опозициска партија, како што објави МИА, говореше за грчката надворешна политика и прашањето за името во Центарот за стратешки и меѓународни студии во Вашингтон. Во однос на преговорите за името објасни дека македонската Влада е отворена за компромис, а ги повтори и позициите на Нова демократија за „пакет решение што ќе вклучува уставни промени и решавање на прашањата за идентитетот и иредентизмот“.
Весникот Катимерини денеска пишува дека „посетата на грчкиот министер за надворешни работи Никос Коѕијас на Скопје, што веројатно ќе се случи на 22 и 23 март, доаѓа во период на зголемени политички тензии по вчерашните случувања во Собранието во врска со донесувањето на Законот за јазиците“.
– Министерот за надворешни работи Никос Коѕијас ќе оствари официјална посета на Скопје во период кога во соседната земја постојат тензии, како што се покажа вчера, за време на гласањето на новиот закон за употреба на малцински јазици во ПЈРМ, наведува „Катимерини“ и додава дека посетата, освен високата симболика, се очекува да донесе и суштински напредок.