За македонските државјани, како и за останатите граѓани од земјите на Западен Балкан што се смета за ризичен регион, од полноќ стапија во сила новите мерки за влез во Австрија, меѓу кои и задолжителен негативен ПСР тест не постар од 72 часа.
Мерката за спречување на ширењето на Ковид-19 се однесува и за граѓаните на Австрија, на Европската Унија (ЕУ), на Европската економска заедница, на Швајцарија, како и за сите државјани на трети земји кои живеат во Австрија, а се враќаат во земјата од региони со ризик. Според указот на Министерството за здравство, новите мерки значат дека лицата мора да покажат негативен ПЦР тест на границата, не постар од три дена.
Доколку лицето го нема при влез, ќе мора во самоизолација што може да се прекине со ПЦР тест, доколку се направи во Австрија во рок од 48 часа, на сопствен трошок. Доколку ПЦР тестот не се направи во рок од 48 часа, на лицето ќе му се изрече парична казна до 1.450 евра. Задолжителен карантин, дури и во случај на негативен ПЦР тест е предвиден само за државјани на трети земји кои не живеат во Австрија, кои, меѓутоа, и натаму не можат да влезат во Австрија без „валидна причина“.
Уредбата, исто така, го намали времетраењето на самоизолацијата од претходните 14 на 10 дена, а државјаните на трети земји не можат да ја прекинат самоизолацијата дури и со ново тестирање во Австрија.
Посебно правило важи за дипломатите, сезонските работници и негувателки од трети земји, а тоа е дека мора да покажат негативен ПЦР тест и да одат во десетдневен карантин, што може да го напуштат само по нов тест направен во Австрија, се разбира доколку е негативен. Транзит низ Австрија без запирање е можен, според уредбата, без никакви ограничувања.