Древниот град Вавилон и националниот парк на Исланд што е преполн со ледени пештери и вулкани се само дел од новите локалитети со статус Светски културни наследства и под заштита на УНЕСКО. Ги преку 1.000 ширум светот. Некои се природни, некои се културни, а некои се и едно и друго. Критериум за нивна селекција е вредноста што ја имаат на човечкиот род.
Двете споменати се можеби и најпознатите што се изгласани од Комитетот за Светско наследство на УНЕСКО во Баку, Азербејџан. Комплетната листа, пренесува британски „Гардијан“ ќе биде позната во текот на викендот.
Вавилон се наоѓа на брегот на реката Еуфрат, на 88 километри од Багдад, и конечно ја добива заслужената заштита по децениските напори на ирачката влада во тој правец. Градот е стар повеќе од 4.300 години и во најголем дел сега е археолошка рушевина додека некогаш беше место на кое промовираа и паѓаа династии. За првпат се споменува во 23 век пред нашата ера и се верува дека во него постоеле т.н. Висечки градини, едни од седумте светски чуда на стариот век.
Историјата на Вавилон е пребогата и блескава. Градот бил преполн со храмови и палати, но добар дел од неговите содржини претрпеа значителна штета низ времето. Меѓу новите локалитети на листата на УНЕСКО се и Хирканските шуми во Азербејџан, древната металуршка работнилница во Буркина Фасо и Охридскиот регион од албанска страна.
Исландскиот парк „Ватнајокул“ е основан во 2008 година. Зафаќа 14 отсто од островот и распространет е на југоистокот од земјата. Со вулкани, земјотреси, топење на глечери, кратери и геотермална активност е толку драматичен што во номинацијата на УНЕСКО се опишува како подрачје на алармантни природни судири, но и заносна хармонија.
Локалитет на листата на УНЕСКО доби и Кина. Станува збор за резерват за птици преселници долж брегот на Жолтото море и заливот Боха, но и голем број видови на риби и ракови и има богат екосистем.