Државната изборна комисија со четири гласа за и четири гласа против го одби последниот приговор на СДСМ и коалицијата за прегласување во избирачкото место 2011 во Теарце.
Членот на ДИК од ДУИ, Субхи Јакупи се иззеде од гласањето, што според Бедредин Ибраими од ДПА е недопустливо, затоа што Јакупи учествувал во дебатата.
– Ние сме тука како членови на ДИК. Тој машки се иззеде, а јас машки ќе гласам. Не смее ниту кој било друг член затоа што бегаме од одговорност. Нема да газам врз нашата едногодишна работа, кој ја прославивме со зурли и тапани – рече Ибраими.
Според претседателот на ДИК, Александар Чичаковски, избирачкиот одбор направил неколку повреди на постапката.
– За мене од изведените докази е битно дека констатиравме неколку повреди на процесот на гласање и најголемиот проблем е што ОИК не им дал добри инструкции. Не можеме со сигурност да потврдиме дека ливчето е употребено за бугарски воз. Најлошо е што ОИК не го затворила гласањето – рече Чичаковски.
Виолета Дума од СДСМ рече дека записникот кој е дел од доверливиот материјал не бил најден, иако членовите на избирачкиот одбор тврделе дека го пополниле.
„Ливчето што недостасувало не е дрпнато, туку е намерно со големо внимание скинато ливчето“, рече Дума.
Според Игор Милев од СДСМ, во целост се исполнети условите дека ДИК треба да го поништи гласањето на ова гласачко место, бидејќи се утврдило дека избирачкиот одбор работел спротивно на изборниот законик.
„Верувајте, не е е случајно. Мора да има намера. Откинати се повеќе од милион ливчиња од кочан и вакво нешто немало. Должност и обврска на одборот биле да се прекине гласањето. Прекршено е и правилото ливчињата да се бројат едно по едно од кутијата, туку овде биле истурени ливчињата на масата за да бидат броени“, рече Милев.
Според Силвана Бонева, тоа што не е најден образецот број 15 не значи дека го нема.
– Гласањето почнало со бројот 1534020, бидејќи сите членови на одборот потврдија дека гласањето почнало со тој број. За нас не е битен образец број 15, туку сведочењето на членовите. Јасен е фактот дека ненамерно е откинат кочанот со ливчето “, рече Бонева, која додаде дека овие приговори од СДСМ биле малтретирање и со цел насила да се направи промена во мандатите кои биле констатирани.
Претходно, во текот на сослушувањето на членовите на избирачкиот одбор, Христина Трипуновска посочи дека било прекршени две правила во однос на нејзиното учество во избирачкиот одбор на избирачкото место 2011 во општина Теарце.
Партиите во следните 24 часа имаат право на жалба до Управниот суд на одлуките, кој пак во рок од 48 часа треба да донесе одлука по жалбите на партиите.