Лидерите на земјите од групата „Г-20“ на самитот во Осака усвоија заеднички пристап за решавање на проблемите и истовремено да не ги зголемат постојните разлики, рече јапонскиот премиер Шинѕо Абе, на крајот од самитот.
„Постојат многу различни мислења за „Г-20“. Велат дека е тешко да се најде заеднички став во овој клуб. Но, многу е важно што можевме да најдеме заеднички пристапи за многу проблеми“, порача Абе на прес-конференција.
Во заедничкото соопштение од самитот, лидерите се заложија за промовирање „слободна, фер и недискриминаторска трговија“ и ветија дека ќе ги користат „сите политички средства“ за поддршка на глобалната економија, во услови на постоечки ризици.
Лидерите на Г-20 се обврзаа и дека ќе се борат против климатските промени, обидувајќи се да ги намалат емисиите на гасови работејќи на финансирање на одржлив развој и подобра иновација.
Во соопштението, исто така, се наведува дека ќе се разгледа широк спектар на чисти технологии и пристапи, вклучително и „паметни градови, екосистеми и пристапи базирани на заедницата“.
Од друга страна, САД во комуникето ја повторија својата одлука да се повлечат од Парискиот договор за климатски промени, „затоа што ги уназадува американските работници и даночните обврзници“.
Германската канцеларка Ангела Меркел го поздрави заедничкиот став за климатските промени од последниот самит во Аргентина и тоа што 19 земји се обврзаа да го почитуваат Парискиот климатски договор, освен САД кои останаа против. Таа додаде дека некои лидери во Осака веќе ја најавиле својата подготвеност да ја зголемат заложбата за намалување на емисиите на штетни гасови на нула до 2050 година.