Шпанија е нов светски кошаркарски шампион во машка конкуренција. До втората титула во својата историја, „фуријата“ стигна по убедливата партија и победа против Аргентина со 95:75 во финалето на мундобаскетот што од 31 август до 15 септември се одржа во Кина. Со бронзата од Кина замина репрезентацијата на Франција која во мечот за третото место ја совлада Австралија со 67:59. За МВП на турнирот е прогласен Рики Рубио, најдобар стрелец е Богдан Богдановиќ со 183 постигнати поени во осумте меча на селекцијата на Србија.
„Бевме на вистинско ниво до крај и испишавме историја. Почит и за Аргентина која нè принуди сериозно да пристапиме и да се бориме за победата. Неверојатно е како изгледавме во тек на целиот турнир, игравме против посилни и поталентирани репрезентации, но на крај победи големото срце“, истакна Рубио кој во истата сала во 2008 година освои сребрен медал на олимпискиот турнир на Игрите во Пекинг.
Двигателот на Шпанија во походот до втората мундијалска титула и со емотивен говор на прес-конференција по финалето. Пред новинарите истакна дека признанието за најкорисен играч на СП и освоеното злато го посветува на неговата мајка која почина пред три години.
„Мајка ми почина пред три години. Секогаш беше покрај мене и секојдневно ме поддржуваше во желбата да станам најдобар. Знам дека никој не ме сака повеќе од неа. И натаму ме турка секој ден. Го чувствувам тоа иако не е повеќе со мене, го чувствувам нејзиното присуство. Поради неа одам напред“.
Освен нив двајца, во идеалниот тим на шампионатот се најдоа и аргентинскиот ветеран Луис Скола, Французинот Иван Фурние и Шпанецот Марк Гасол кој, патем, стана и само втор играч по Ламар Одом кој во иста календарска година освои и шампионски прстен во НБА лигата (со екипата на Торонто) и светски шампионски трофеј со националниот тим. Американецот во тоа успеа во 2010 година со Лос Анџелес Лејкерс и со САД на првенството во Турција.
„Ова се неверојатни три месеци за мене. Многу сум среќен и благословен за позицијата во која се наоѓам. Сонцето ќе продолжи на изгрева и заоѓа, животот продолжува, но ние сме светски шампиони“, рече 34 годишниот Марк Гасол.
Запрашан дали очекува да заигра со неговиот брат на Игрите во Токио во наредното лето, играчот на шпанската репрезентација и на „репторси“ додаде:
„Кога се наоѓате во овој период од кариерата, никогаш не можете однапред да знаете такви работи. Сакате да играте, но не можете да дадете ветување. Ова, веројатно, беше последно Светско првенство“.
Пласман на Олимписките игри во Токио осигураа селекциите на Шпанија, на Аргентина, на Франција, на Австралија, на САД, на Нигерија, на Иран и на Јапонија како домаќин. Оние репрезентации, пак, кои не успеаја во тоа низ настапите на СП 2019, ќе имаат прилика за поправен преку квалификациските турнири во првата половина од 2020 година. За преостанатите четири празни места ќе играат Србија, Чешка, Полска, Литванија, Италија, Грција, Русија, Бразил, Венецуела, Порторико, Доминиканска Република, Германија, Нов Зеланд, Тунис, Канада и Турција.
И наредното Светско првенство во кошарка ќе се одржи на азискиот континент. Негови ко-домаќини од 1 до 17 септември во 2023 година ќе бидат Филипини, Јапонија и Индонезија.