За денеска се закажани завршните зборови на обвинителите од СЈО и од одбраната во случајот за уништување на 2.047 службени списи, од кои 22 се однесуваат на системите за следење на комуникациите, во случајот познат како Тврдина 2.
Откако беше одбиено барањето на одбраната на првообвинетиот во „Тврдина 2“, екс началникот на Петтата управа во МВР, Горан Грујевски да биде одложено судењето поради процесот на екстрадиција, судијката Лидија Петровска го одби и барањето на одбраната за проширување на доказната постапка.
Доказната постапка во случајот Тврдина 2 која заврши минатата недела, се одвиваше околу час и половина без присуство на јавноста, поради декласифицираните докази добиени од УБК, кои ги побара Специјалното јавно обвинителство.
Специјалната обвинителка Ленче Ристоска, по минатонеделната расправата во судот изјави дека тие се комплетно убедени дека судот ќе донесе осудителна пресуда, бидејќи имаат уверливи докази.
Одбраната на Грујевски и понатаму тврди, како што изјави адвокатот Љупчо Шврговски, дека несфатливо е зошто на Грујевски му се суди во отсуство кога се знае каде бил во моментов, односно дека е во притвор во затвор во Солун. Воедно Шврговски рече дека решението на судијката Петровска, ќе биде предмет на жалба бидејќи не дозволила одбраната да побара копии од документацијата која била уништена од БЈБ и УБК.
Судијката денеска го отфрли барањето на адвокатот Грујевски, судењето да се одложи до екстрадицијата и одлучи да му се суди во отсуство.
Во „Тврдина 2“, првобовинет е ексначалникот на Петтата управа, Горан Грујевски, со уште шест службенички во УБК.
Кон средината на октомври, Горан Грујовски и Никола Бошкоски и двајцата обвинети од СЈО кои беа во бегство, уапсени се во Солун.
Тие се бараа со меѓународна потерница, по што беа приведени.