Од граѓанската иницијатива „Зелен хуман град“ се незадоволни од најавите на премиерот Зоран Заев за намалување на прагот за независни листи од два на еден процент или евентуално негово укинување со измените на Изборниот законик.
– Му порачуваме дека учеството во изборната трка на независни граѓани кои не сакаат да се дел од ниедна партија – не е и не може да биде предмет на пазарење. Уште помалку, предмет на пазарење меѓу партиите. Следствено, крајно е понижувачки да се слуша некој кој до вчера беше „на браникот на демократијата“, денес да се става над законот, да зборува во име на други институции кои – ако во Македонија се практикува поделбата на власта – се целосно независни од него и неговата функција, се вели во соопштението на „Зелен хуман град“.
Алармираат дека за независна советничка листа за Град Скопје ќе бидат потребни повеќе граѓански потписи отколку за кандидидирање на пратеници на парламентарни избори.
– За кандидирање на парламентарни избори, независна листа треба да собере 1.000 потписи од цела изборна единица, а за Град Скопје со зголемувањето на прагот на 1% треба да се соберат 5.000 потписи, колку што на локалните избори во 2017 г. „тежел“ еден советнички мандат. Интересно, членот од Изборниот законик во кој е уреден бројот на потребни потписи за кандидирање пратеници преку независна листа не е предмет на измена сега. Ќе биде ли менуван пред следните парламентарни избори ако се кандидира ЗЕЛЕН ХУМАН ГРАД со своја, независна, листа, прашуваат од иницијативата.
Тие од шефот на државата Стево Пендаровски, министерството за правда и од Собранието бараат за Изборниот законик да се отвори јавна дебата во која ќе учествува престставник на „Зелен хуман град“, за изборните правила да не решаваат само поголемите политички партии кои, според „Зелен хуман град“, носат одлуки во нивни интерес. Иницијативата бара прагот за потписи за независни листи да се намали десеткратно за сите општини и да се воведе собирање потписи надвот од општинските канцеларии на ДИК, односно на улица со приложување лична карта, согласно со препораките од ОБСЕ/ОДИХР од 2017 година, каде што е наведено дека „треба да се размисли за обезбедување алтернативни методи за собирање потписи, со цел да се намали потенцијалот за заплашување“. Иницијативата, исто така бара и измени на Изботниот законик со кои нема да се овозможи рекламирањето во медимите да биде во корист на големите политички партии. „Зелен хуман град“ бара да се почитуваат препораките на ОБСЕ/ОДИХР, а во овој случај да не се менува Изборниот законик непосредно пред одржување на локалните избори кои се закажани на 17 октомври.