Обвинителот на германската регионална држава Шлезвиг-Холштајн денес соопшти дека побарал од судот да дозволи екстрадиција на поранешниот претседател на каталонската регионална Влада, Карлес Пучдемонт во Шпанија, каде е обвинет за поттикнување бунт.
– Канцеларијата на обвинителот на Шлезвиг-Холштајн по интензивни проверки на европскиот налог за апсење на Пучдемон што го издаде Шпанија, поднесе барање за екстрадиција до регионалниот суд, се наведува во соопштението.
Обвинителството оцени дека барањето на Шпанија за екстрадиција под обвинение за бунт и финансиски малверзации е оправдано, бидејќи можело да се очекува дека организирањето на противуставниот референдум за независнот на Каталонија, ќе доведе до насилни судири.
Финалната одлука ќе треба да ја донесе компетентниот германски суд во наредните 60 дена.
Обвинителот исто така одлучи дека Пучдемонт треба да остане во затвор поради ризик од бегство.
Многумина се надеваа дека германскиот закон нема да дозволи екстрадиција бидејќи во германскиот закон не постои обвинение за бунт како што тоа го бара Шпанија. Но, обвинителството, во својата анализа, оцени дека акцијата на Пучдемонт се доближува во «високо предавство» што фигурира во германскиот кривичен закон.
Во обид да избегне екстрадиција, Пучдемонт вчера изјави дека кривичното дело бунт, за кое го товарат шпанските власти, подразбира употреба на сила.
– Немаше насилство, значи немаше ни бунт, изјавил Пучдемонт.
Германските власти минатата недела го приведоа Пучдемонт врз основа на меѓународната потреница што против него ја објави Шпанија под обвинение за бунт и поттикнување на бунт во врска со одржувањето на референдумот за отцепување и прогласувањето на независност на Каталонија на 27 октомври 2017 година.
Девет каталонски политичари се во затвор во Шпанија а шестмина од нив се членови на извршната власт во Каталонија. Помеѓу нив е екс претседателката на каталонскиот парламент.
Уште една каталонска политичарка, Клара Понсати, се наоѓа во Шкотска и сама се пријави во полицијата. Таа очекува одлука на шкотските власти за нејзината екстрадиција.