Украинскиот претседател Володимир Зеленски вечерва се обрати до нацијата преку видео објавено на неговиот официјален канал на Телеграм велејќи дека Русија сè уште не одговорила на предлогот за прекин на огнот и директна средба меѓу двајцата завојувани претседатели во Истанбул.
Тукушто разговарав со претседателот Ердоган. Тоа беше суштински разговор. Благодарен сум за неговата поддршка. Ја потврдив подготвеноста на Украина за директен и суштински дијалог со Путин. Украина отсекогаш ја поддржувала дипломатијата. Подготвен сум да бидам во Турција, рече Зеленски.
За жал, светот сè уште не доби јасен одговор од Русија на бројните предлози за прекин на огнот. Русите сè уште гранатираат и напаѓаат. Москва молчеше цел ден во врска со предлогот за директна средба. Оваа тишина е доста чудна. Но, Русија ќе мора да ја заврши оваа војна на еден или друг начин, и би било подобро ако го стори тоа што е можно поскоро. Нема смисла да се продолжи со убивањето, нагласи тој.
Тој додаде дека Турција е подготвена да биде домаќин на состанокот и дека е важно што и американскиот претседател Доналд Трамп ја поддржал идејата за разговори. „Би сакале претседателот Трамп да биде во Турција“, рече Зеленски.
Украина не ја сакаше оваа војна, ниту една секунда откако започна. Заедно со нашите партнери, работиме на обезбедување безбедност, изградба на цврста основа за мир и преземаме чекори за да ја направиме дипломатијата навистина ефикасна, заклучи тој.