Украинскиот претседател Володимир Зеленски ги нападна западните лидери кои според него ги овозможиле руските воени злосторства во Украина, вклучително и поранешната германска канцеларка Ангела Меркел и поранешниот француски претседател Никола Саркози.

Во обраќањето одржано синоќа по извештаите за воени злосторства извршени од руските сили Зеленски рече: „Ги поканувам г-ѓа Меркел и г-дин Саркози да ја посетат Буча, за да видат дека политиката на 14 -те години отстапки за Русија доведоа до тоа“, додавајќи дека сака тие „со свои очи да ги видат измачените Украинки и жени“.

Зеленски истакна и дека Советот за безбедност на ОН ќе се состане утре за да ги разгледа воените злосторства на Русија, истакнувајќи дека ќе биде предложен нов пакет санкции. „Но, сигурен сум дека тоа не е доволно“, рече Зеленски. „Мора да се извлечат повеќе заклучоци. Не само за Русија, туку и за политичкото однесување што всушност дозволи ова зло да дојде на нашата земја“.

Зеленски потсети дека во неделата беше 14-годишнината од самитот на НАТО во Букурешт во 2008 година, кога сојузниците требаше да одлучат дали да дадат зелено светло за Акциониот план за членство во НАТО – статус што ги става земјите на патот кон пристапување во Алијансата – за Грузија и Украина. На крајот, лидерите одлучија да не им дадат таков статус на двете земји иако во нивната декларација се тврдеше: „Денес се договоривме овие земји да станат членки на НАТО“.

Наводно, Германија под Меркел и Франција под Саркози биле меѓу оние кои ги блокирале НАТО амбициите на Грузија и Украина – во обид да се смири рускиот претседател Владимир Путин, според Зеленски.

За самитот во 2008 година, Зеленски рече дека „имаше шанса да се извади Украина од „сивата зона“ во Источна Европа и сивата зона меѓу НАТО и Русија. „Надвор од сивата зона во која Москва мисли дека им е дозволено да прават што сакаат. Дури и најстрашните воени злосторства“, подвлече тој.

Украинскиот претседател продолжи: „Скриено зад оптимистичките дипломатски изјави дека Украина може да стане членка на НАТО, во 2008 година  всушност имаше одбивање од Алијансата да ја прифати Украина. Се криеше апсурдниот страв на некои политичари од Русија. Мислеа дека со одбивањето на Украина, можат да ја смират Русија, да ја убедат да ја почитува Украина и да живее нормално покрај нас. Во текот на 14 години од таа погрешна пресметка, Украина преживеа револуција и осум години војна во Донбас. И сега се бориме за нашите животи во најстрашната војна во Европа од Втората светска војна“.

Но, откако конкретно ги прозва Меркел и Саркози и ги покани да ја посетат Буча, каде што новинарите и невладините организации известуваат дека руските сили извршиле воени злосторства против украинските цивили, Зеленски го ублажи својот укор. „Сакам да бидам разбран точно“, рече тој. „Не го обвинуваме Западот. Ние не обвинуваме никого освен конкретните руски сили кои го направија ова на нашиот народ. И оние што им дадоа наредби“.

Како одговор, портпаролот на Меркел рече: „Поранешната германска канцеларка Ангела Меркел останува на нејзините одлуки во врска со самитот на НАТО во Букурешт во 2008 година. Со оглед на тоа што злосторствата станаа видливи во Буча и на други места во Украина, сите напори на германската влада и меѓународната заедница да застанат до Украина и да стават крај на руското варварство и војната против Украина имаат целосна поддршка од поранешната германска канцеларка“.

Москва негира вмешаност во „наводните“ воени злосторства во Буча.

(преземено од новинските агенции)