Во рамки на саемот „Винска визија на Отворен Балкан“ денеска во Белград, Северна Македонија, Србија и Албанија, потпишаа Договор за обезбеденост со храна.

Како што објави министерот за земјоделство, шумарство и водостопанство Љупчо Николовски кој е потписник на договорот од македонска страна, договорот ќе овозможи земјите членки на Отворен Балкан да си помагаат меѓусебно во случај на прекин на синџирите на снабдувањето со храна како последица од глобалната криза.

„Денеска постигнавме уште еден голем успех, уште една цел од која најголем бенефит ќе имаат нашите народи. Овој Договор е само почеток на една многу поголема идеја, а тоа е развивање на сеопфатен акциски план за долгорочна обезбеденост со храна, кој е проектиран до 2030 година. Ја реафирмираме солидарноста како основен принцип на Отворен Балкан, ја зајакнуваме регионалната соработка, ги отвораме границите за непрекината трговска размена и овозможуваме стабилен и непречен проток во снабдувањето на основните земјоделско-прехранбени производи без никакви ограничувања“, соопшти Николовски.

Договорот, дополнува министерот, е уште една потврда дека Србија, Албанија и Северна Македонија се заедно во овие тешки времиња.

Согласно договорот, доколку некоја од земјите се соочи со недостаток на храна, другите две земји искажуваат силна подготвеност да помогнат со тоа што нема да има забрани за тргување со основните земјоделско прехранбени производи. (С.К.)