Најмалку 49 лица се повредени во силниот земјотрес што попладнево ја погоди Албанија и предизвика голема материјална штета во земјата, вознемиреност меѓу нејзиното население, но и кај жители во речиси сите држави во регионот. Покрај западниот сосед, се тресеше и западниот дел на Македонија и Скопје, а потресот се почувствува и во делови на Грција, на Косово, во Србијам, во БиХ и во Хрватска. Епицентарот на потресот беше во близина на Драч, на длабочина од 10 километри во Јадранското море, и според инструментите на Европската сеизмичка опсерваторија беше со интензитет од 5,8 степени по Рихтеровата скала. Според албанските сеизмолози, денешното тресење на тлото е најсилно во земјата во последните 20-30 години.
Албанските медиуми, пак, пренесуваат за сериозни оштетувања на зградата на Рударскиот факултет во Тирана како последица на силниот земјотрес. Сериозното трепење на тлото најпрво доведе до оштетување на ѕидовите на објектот по што и целосно се урнаа. Тотално се уништени и два автомобила што беа паркирани во дворот на факултетот.
„Земјотресот со магнитуда од 5,8 степени според Рихтер и интензитет од 7,5 степени, на 30 километри северно од Драч е најсилен до сега по оној од април 1979 година. Почувствуван е во сите делови на Албанија и во соседните земји“, наведува ТВ „Ора њуз“.
Тлото во Драч не мирува. По двата силни земјтреса регистрирани се уште неколку со послаб интензитет. Надлежните упатија апел до жителите на Драч да не се враќаат во домовите поради можноста за нови потреси. Улиците и плоштадите во градот се преполни од народ.
Албанскиот премиер Еди Рама го откажа учеството на Генералното Собрание на Обединетите Нации во во Њујорк и вечерва се враќа од Франкфурт поради вонредната ситуација по силниот земјотрес што ја погоди попладнево Албанија.
Министерството за одбрана на Албанија, повикувајќи се на Институтот за енергетика, вода и животна средина, соопшти дека интензитетот на земјотресот бил 5,8 степени со епицентар покрај островот Родон на 30 километри од Драч.
Во меѓувреме државната полиција е ставена во целосна готовност. Врз основа на наредбата на генералниот директор Анди Велија, полицијата, вклучувајќи ја и сообраќајната, е на терен за да го регулра сообраќајот, да бидат на располагање на граѓаните, да ја намалат паниката и да го обезбедуваат нивниот имот.