https://www.youtube.com/watch?v=xE1V6-e1oAE
Силен земјотрес со јачина од 6,4 степени по скалата на Рихтер утрово (03.54 часот) ја погоди Албанија, но потресот сериозно се почувствува и во Македонија и во сите останати држави во регионот на Западен Балкан и пошироко. Според наводите на светските сеизмолошки станици, епицентарот бил југоисточно од Драч на длабочина од 20 км.
По првиот удар се забележани уште два со јачина од 5,3 степени и 5,1 степен по рихтеровата скала и десетина послаби. Според информациите од медиумите досега има две жртви- 32 годишен маж кој скокнал од балкон во Курбин и повозрасна жена, додека бројот на повредени е над 150 лица кои добар дел завршија во болниците во Тирана, и голема материјална штета.
Локалните медиуми јавуваат дека во Драч паднала петокатница, а од урнатините е спасено едно дете. На улица излегоа и жителите на Тирана од кои дел, како што објавија албанските медиуми, со бебиња во раце.
Албанскиот премиер Еди Рама во првата реакција изјави дека ова е драматичен момент, но оти заедно ќе се справат со него.
-Ова е драматичен момент, треба да ја зачуваме смиреноста, да бидеме еден до друг и заедно да се справиме со состојбата. Ние ќе сториме се и со нашите големи пријатели ќе ја надминеме оваа ситуација. Храброст!Трпение! Солидарност, напиша Рама на Фејсбук.
Има и жртви, па затоа Рама додава дека целата држава е на нозе.
-Од силниот земјотрес има сериозни последици и, за жал, загубивме животи. Сите државни структури се во функција уште од првите моменти по потресот. Интензивно се работи на неколку фатални места во Драч и Туман за да се спаси секој можен живот, наведува Рама,кој од рано утринава е во Драч.
Земјотресот предизвика силна вознемиреност меѓу граѓаните во Македонија кои будни го дочекаа новиот работен ден.
Massive damages#Albania #Earthquake pic.twitter.com/0BXKW7ExDJ
— Igli Lime🇦🇱 (@IgliLime) November 26, 2019
Најголема штета, според владините портпароли, е регистрирана на објекти во Драч. Ова е најсилен земјотрес во Албанија во последните 30 години, втор во само три месеца по оној во септември кој беше со јачина од 5,6 степени по Рихтеровата скала и предизвика оштетувања на 500 куќи.
Земјотресот, покрај во Албанија и Македонија, го почувствуваа и граѓаните на Србија, на Црна Гора, на Косово, на БиХ, на Хрватска, на Бугарија и на Италија.
Според албанскиот Институт за сеизмологија, во период од четири часа регистрирани се повеќе од 100 потреси.