Најмалку 20 лица загинаа, а околу 300 се повредени во земјотрес со јачина од 5,7 степени според Рихтеровата скала што утрово го погоди јужен Пакистан, соопшти администрацијата за управување со катастрофи. Спасувачките екипи велат дека повеќето од загинатите се жени и деца.
Земјотресот се случи на релативно плитка длабочина од 20 километри, со епицентар на 102 километри источно од градот Квета, објави американскиот геолошки институт (USGS).
Се урнаа повеќе од 100 глинени куќи, а многу згради се оштетени. Телевизиските снимки покажуваат згради со пукнатини, урнати покриви и sидови.
Стотици луѓе останаа без покрив над главата, изјави Сохаил Анвар, заменик-комесар на областа Харнаи во провинцијата Балучистан, за агенцијата „Ројтерс“.
„Наредив итна помош за жртвите од земјотресот во Харнаи, Балучистан, итно да се процени штетата за навремена помош и надомест. Сочувство и молитви за семејствата кои ги загубија своите најблиски“, рече пакистанскиот премиер Имран Кан.
Најмалку девет тешко повредени лица беа однесени во Квет со воен хеликоптер, објави „Асошиејтед прес Пакистан“.
Земјотресите во Пакистан се чести, бидејќи земјата се наоѓа на место на спојување на индиските и евроазиските тектонски плочи.
Земјотрес со јачина од 7,7 степени го погоди Квет во 1935 година. Меѓу 30.000 и 60.000 луѓе загинаа, а поголем дел од градот беше уништен. Во 2005 година, пак, загинаа околу 73.000 луѓе во земјотрес со јачина од 7,6 степени според Рихтеровата скала на 95 километри североисточно од главниот град Исламабад.