ЖРК Вардар против Ростов и Ѓер против ЧСМ Букурешт се полуфиналните двојки во ракометната Лига на шампиони. Ова е епилог од ждрепката за Фајналфор турнирот што ќе се одржи на 12-13 мај во Будимпешта. Промоцијата на новиот европски првак ќе биде во „Ласло Пап арена“ во унгарската метропола како што беше случај и во изминатите четири години.
„Не знаеме дали н` лежат. Само двапати имаме играно против нив. Но, знаеме дека имаат добри ракометарки, добри крила, голманки како Пешоа и Седојкина кои бранат во одлична форма. Сериозна екипа и квалитетна екипа во секој случај кој не е залутана на завршниот турнир“, истакна Андреа Пенезиќ која присуствуваше на ждрепката.
Иако рускиот тим од Дон е дебитант во завршниците, а „црвено-црните“ девојки ќе играат по петти пат, сепак, се свесни дека не смеат да го потценат Ростов. Влогот е финале и атак на тронот пришто лани беа запрени од Ѓер со 31:30. Оваа година ситуацијата е сосема поинаква. Македонскиот женски ракометен првак ја игра последната со актуелниот ростер, па оттука и победничките и шампионски желби меѓу ракометарките на Ирина Дибирова за раздолжување на опремата со престижниот трофеј во клупските витрини во СЦ „Јане Сандански“.
„Тоа што Ростов е дебитант не треба ништо да значи. Не треба премногу да размислуваме за нив, треба да се фокусираме на нашата игра, да одиграме цврсто во одбрана. Имаме, речиси, еден месец за подготовки. Ќе следуваат анализи до детаљ за нивната игра и, секако, работа за обезбедување на ново финале“, додаде левиот бек на ЖРК Вардар и на репрезентацијата на Хрватска.
Сатницата за полуфиналните дуели во Будимпешта ќе биде дополнително утврдена. ЖРК Вардар има три бронзени медали и еден сребрен во досегашните четири учества на Фајналфор во шампионската лига на ЕХФ.