Ждрепката за групната фаза во Лигата на шампиони на УЕФА за сезоната 2019/20 ги раздели Црвена звезда и Динамо Загреб. Српскиот првак наесен ќе игра во групата Б со Баерн Минхен, со Тотенхем и со Олимпијакос, а хрватскиот претставник во чии редови е Аријан Адеми заврши во групата Ц со Манчестер сити, со Шахтјор Доњецк и со Аталанта.
Македонскиот фудбал ќе има свој репрезент и во Наполи (Елиф Елмас) кој е дел од групата Е со бранителот на титулата Ливерпул, со Салцбург и со Генк. Епитетот „група на смртта“ го доби Ф конкуренцијата што ги обеднини Барселона, Борусија Дортмунд, Интер и Славија Прага.
Гостите на ждрепката во Монако беа Холанѓанецот Весли Снајдер и чешкиот голман Петр Чех. Освен извлекувањето на групите за претстојната сезона, УЕФА ги награди и најдобрите фудбалери за минатата на церемонијата што еден до друг ја следеа Лионел Меси и Кристијано Роналдо. Но, најпрво беше одликуван Ерик Кантона со т.н. „Претседателска награда“, а по него со статуетки од сцената заминаа и Алисон Бекер (за најдобар голман), Вирџил ван Дајк (за најдобар дефанзивец), Френки де Јонг (за најдобар играч во средниот ред) и Лионел Меси (за најдобар напаѓач).
Лига на шампиони – сезона 2019/20
Група А: ПСЖ (Франција), Реал Мадрид (Шпанија), Бриж (Белгија), Галатасарај (Турција)
Група Б: Баерн Минхен (Германија), Тотенхем (Англија), Олимпијакос (Грција), Црвена звезда (Србија)
Група Ц: Манчестер сити (Англија), Шахтјор Доњецк (Украина), Динамо Загреб (Хрватска), Аталанта (Италија)
Група Д: Јувентус (Италија), Атлетико Мадрид (Шпанија), Баер Леверкузен (Германија), Локомотив Москва (Русија)
Група Е: Ливерпул (Англија), Наполи (Италија), Салцбург (Австрија), Генк (Белгија)
Група Ф: Барселона (Шпанија), Борусија Дортмунд (Германија), Интер (Италија), Славија Прага (Чешка)
Група Г: Зенит Санкт Петербург (Русија), Бенфика (Португалија), Олимпик Лион (Франција), Лајпциг (Германија)
Група Х: Челзи (Англија), Ајакс (Холандија), Валенсија (Шпанија), Лил (Франција)