Европскиот ракометен првак Вардар од 27 до 31 август во Дамам, Саудиска Арабија по вторпат ќе атакува на трофејот на Светското клупско првенство или популарниот Супер Глоуб. Претстојното издание на турнирот ќе биде 13, но воедно и прво со 10 екипи поради што се воведени и квалификации за четврт-финале во кои ќе играат Сиднеј Јуниверзити – Кил, односно, Ал Мудхар – Њујорк сити.
Победникот од саудиско-американскиот дуел ќе биде ривал на „црвено-црните“ во четврт-финалето на 28 август од 12.30 часот, а подобриот од австралиско-германската пресметка ќе излезе на мегдан на египетски Замалек во топ 8 фазата.
Останатите две двојки се Ал Вехда (Саудиска Арабија) – Таубате (Бразил) и Барселона (Шпанија) – Ал Духаил (Катар). Полуфиналните мечеви се закажани на 29 август, а за бронза и за злато на 31 август. Сите натпревари ќе се одиграат во салата „Грин Халс“ во Дамам, град на истокот на Саудиска Арабија и шесто по големина во земјата по Ријад, Џеда, Мека, Медиа и Таиф и истовремено администативен центар на нафтената индустрија.
Титулата ја брани Барселона која во ланското финале го совлада Фухсе Берлин со 29:24 (13:12). Вардарци учествуваа на Супер Глоуб и во 2017 година кога во четврт-финалето го елиминираа ирански Нафт&Газ со 30:22 (15:10) по што следуваше пораз од Барселона во полуфиналето со 29:32 (12:15) по што и убедлив триумф над Ал Сад од Катар со 37:19 (10:14) за освојување на третото место и бронзениот медал на турнирот.