Жестоки судири денеска избувнаа во повеќе француски градови во кои има и тешко повредени и десетици уапсени, на протестите на коишто учествуваа најмалку 170.000 работници и студенти против предлог во Законот за труд.
Министерот за внатрешни работи на Франција, Бернар Казнев, извести дека се повредени 24 припадници на полицијата, меѓу кои тројца потешко.
Уапсени се 124 луѓе.
Осудувајќи ги судирите, претседателот на главниот студентски синдикат UNEF, Вилијам Мартинет, изрази жалење поради „непримерната употреба на сила од страна на полицијата“.
Околу 170.000 луѓе, според проценките на полицијата, или 500.000 според процените на синдикатите, учествуваа на протестите во четириесетина градови барајќи по четврти пат во последните два месеца, повлекување на предлог законот, којшто, како што истакнуваат, е „целосно неприфатлив“.
Протестите ги одбележаа судири во Париз, каде што маскирани демонстранти ги нападнале полицајците, тешко ранувајќи тројца од нив.
На протестите им се приклучија и уметниците, коишто преговараат за нивните надоместоци за невработеност.
Синдикатите оценуваат дека понудениот текст на законот нема да го овозможи неопходното отворање работни места и ќе ја продлабочи несигурноста, како и дека ќе ги заостри социјалните разлики, особено кон жените и кон младите.
Покрај протестите, рганизирани беа и штрајкови, поради кои повторно беше во прекин сообраќајот. На парискиот аеродром беа откажани околу 20 отсто од летовите, а беа пријавени и доцнења.