Серијата земјотреси кои го стресоа тлото на Скопје и околината несомнено остави многумина во состојба на паника. Луѓето веднаш и по најмалите потреси излегоа на улиците а многумина изминатите две ноќи ги поминаа во своите автомобили или најблиските паркови.
Некои од постарите објекти се здобија и со помали материјални штети а над 300 телефонски пријави добил Центарот за управување со кризи (ЦУК).
Зоран Костовски, кој живее на „Трета македонска бригада“ во Мичурин е еден од оние кој неколку пати свртел на бројот за пријава на штета 195, но безуспешно. Тој стравува дека оштетените оџаци на зградите, Центарот треба да ги види и да констатира состојба, пред истите да однесат жртва доколку се урнат.
– Вртев на 195 не можам да добијам никој. Оџаците од зградата се пред паѓање. Беа во ред, но со земјотресот готови се да паднат и треба тоа да се санира пред да се изгуби човечки живот, вели за НОВА, Костовски, додавајќи дека тој е подготвен, заедно со станарите колку можат да помогнат и финансиски.
Зградата во која живее тој е направена вели во 1960 година и го претрпела големиот земјотрес во 63′ без посериозни последици.
– Оваа зграда е од 1960 година и го издржа големиот земјотрес од кога сме вселени. Тогаш одлучија дека зградата била во ред и дека во неа може да се живее. Го поминавме и земјотресот од 63′ и овој последниот дома. Малку е стресно но се надеваме дека ќе останеме дома и дека нема да има потреба да бараме нов дома, изјави Костовски кој бара да стапи во контакт со ЦУК што е можно побрзо за тие да направат преглед.
Зградата во која живее тој освен трите оџаци оштетена е и во внатрешниот дел. Помала површина од скалите е испукана, а исто така и помал дел од фасадата.
Помала материјална штета претрпеа и други граѓани кои живеат во Скопје, на речиси истите делови од објектите – покривите, оџаците или фасадите.
Според податоците на Сеизмолошката опсерваторија при ПМФ , од неделата до вчера во земјава се почувствувани 16 земјотреси. Првиот од низата беше регистриран во неделата неколку минути пред 7 часот со јачина од 4,4 степени според Рихтер.
Најсилниот пак е регистриран истиот ден во 15.10 часот со магнитуда од 5,3 степени по Рихтер.
Вчеравечер во Скопје и околината беа почувствувани два последователни земјотреса во 19.53 часот – првиот со магнитуда од 2,4, а вториот од 4 степени според Рихтеровата скала.
Епицентарот и на овие земјотреси бил во источниот дел на скопското подрачје.
Претходно во текот на денот, два потреси беа регистрирани во 11.50 и 14.19 часот со магнутуиди од 2,3 и 3,7 степени според Рихтеровата скала.
Сите потреси се во скопското епицентрално подрачје.