Пораки со идентична желба си разменија ЖРК Вардар и Будуќност на разделба во Скопје по завршниот турнир во регионалната лига. По меѓусебната пресметка во ВРХЛ лигата си посакаа судир за титула и на Фајналфор во Лигата на шампиони во Будимпешта.
„Го остваривме планираното. Пресуди нашата желба за победа. Натпреварите во регионалната лига беа добредојдени пред Фајналфор турнирот во Лигата на шампиони. Се надевам дека ќе играме финале и за европската титула“, истакна Ацо Станковски, тренер на ЖРК Вардар на прес-конференцијата по дуелот со Будуќност.
Македонскиот женски ракометен првак го совлада црногорскиот со 27:25 во финалниот натпревар од регионалниот проект. Пред двата клуба сега се настапи во европската клупска елита. Вардарки во полуфиналето ќе играат со ЧСМ Букурешт кој во Унгарија ќе патува како бранител на титулата, а Будуќност ќе игра со Ѓер.
„Вардар покажа најмногу во регионалната лига и заслужено го освои пехарот. Честитки за победата. Одигравме одлични натпревари што беа корисни за двете екипи. Би било добро да има реприза на ова финале и во Будимпешта“, рече тренерот на Будуќност, Драган Аџиќ.