Кандидатот на Демократската Унија за Интеграција (ДУИ) за прв премиер Албанец, Насер Зибери во име на партијата, истакна дека ниту една опција за формирање на парламентарно мнозинство не е исклучена, но нагласи оти лидерот Али Ахмети засега останува на позицијата тој да биде мандатар за состав на новата Влада.
„Ахмети не ги затвора сите врати, но засега останува на позицијата јас да бидам мандатар. Се разбира дека не се исклучуваат сите опции, впрочем продуктот на создавање на парламентарно мнозинство е резултат на преговори, меѓутоа неговите аргументи одат во насока јас да бидам мандатар, од причина што претседателот на државата е Македонец, претседателот на Собранието би бил Македонец, многу носители на јавни функции се Македонци. Ахмети смета дека треба да се урнат последните етнички бариери, а тоа ќе ги зајакне внатрешните капацитети и државата ќе докаже дека секоја функција е еднакво достапна за секој“,.изјави Зибери за Слободен печат.
За нас не е најважно дали ДУИ ќе биде дел од идната коалиција, за нас е важно дали ќе се валоризираат политичките определби за тоа што е наша аспирација, потенцира Зибери.
„Има еден џентлменски договор меѓу партиите Алијанса/Алтернатива, ДУИ и останатите дека оној што ќе добие макар еден глас повеќе, а не мандат, ќе се помири со фактот дека ги изгубил изборите и дека нема да чека на ред кој мандатар која партија ќе ја покани на преговори за составување на идната влада. На тој план политичките партии на Албанците имаат еден консензус. Дали ќе опстанат не можам да гарантирам, но, секако, се свесни за реперкусиите и политичката перспектива која може да им се случи доколку без легитимитет бидат носители на извршната власт, а ДУИ ја потиснат во опозиција“, објаснува Зибери.
Според него, можноста од преземање на пратеници од лево кон десно или од десно кон лево, би била најлошата услуга што може да ѝ се случи на државата.
„Треба да се испочитува волјата на граѓанинот и ниту Заев, ниту Мицкоски, ниту Ахмети имаат право да тргуваат. Заев и Мицкоски немаат право да бараат пратеник повеќе за формирање влада. Треба да се почитува и начелото победник со победник“, заклучи Зибери.