По три години, 149 натпревари на сите фронтови и девет освоени трофеи, Зинедин Зидан поднесе оставка на тренерската позиција во Реал Мадрид. Одлуката што францускиот менаџер ја обелодени на вонредна прес-конференција во Мадрид, одекна како бомба во светската фудбалска јавност, беше дочекана во шок од навивачите на „кралскиот“ клуб, а го изненади и првиот човек на тимот од „Сантијаго Бернабеу“, Флорентино Перез.
„Едноставно сум заситен. Го сакам Реал Мадрид и затоа се повлекувам бидејќи тимот треба да продолжи по победнички патеки, а јас не гледам начин, мотив и визија за четврта титула во низа во Лигата на шампиони. Во денешно време тоа е невозможна мисија од причина што многу екипи играат врвен фудбал. Затоа и заминувам оти сметам дека е потребна промена на екипата“, се обрати Зидан пред преполната сала со новинари во Мадрид.
Ваквиот негов потег дојде во најнеочекуван момент. Се случува на само неколку дена од големиот триумф над Ливерпул во Лигата на шампиони за трет освоен „пехар со уши“ на „кралевите“ во серија што Французинот го прави прв менаџер со таков подвиг. И не само тие. Потегот на Зидан е неочекуван и за двете круни на Светските клупски првенства, двата Суперкупа на УЕФА од кои едниот беше освоен лани на „Телеком арена“ во Скопје по победата над Манчестер јунајтед, потоа шпанската Суперкуп титула и во Примера.
„Ако по три години не гледам јасен начин како да продолжиме да победуваме или како јас би сакал, тогаш е вистински момент за разделба и промена. Јас сум победник и мислам дека екипата тешко ќе продолжеше со победи ако останев. Донесов ваква одлука затоа што го сакам Реал и претседателот Перез на кого сум благодарен за сè досега“, заклучи Зидан за добивање на гласен аплауз од новинарите како што ги собираше и од трибините за секоја негова мајсторија од времето во копачки.
Неговата одлука е конечна и неотповиклива, па станува јасно дека Реал Мадрид ќе мора во нова ера под водство на друг кормилар за кого Флорентино Перез ќе треба што поскоро да тргне во потера.
Перез: Изненаден сум, ова е тажен ден за мадридистите
Набрзо по објавата на Зидан се огласи и претседателот на Реал Мадрид, Флорентино Перез кој не криеше изненадување од потегот на Французинот. Иако не очекувал ваков расплет, сепак, истакна дека го почитува ставот на досегашниот тренер на „кралевите“ и го прифаќа со жалење.
„Ова е неочекувано за сите нас, ова е тажен ден за сите мадридисти. Сакав Зидан засекогаш да остане со нас. Реал засекогаш ќе биде негова куќа. Благодарен сум на сè што стори за нас“, истакна Перез.
Медиумите, сепак, изразуваат сомнеж дали изнесената причина на Зидан за заминување од Реал е вистинска. Она што го нагласуваат како факт е состанокот меѓу Перез и Французинот зад затворени врати по што дојде до свикување на вонредна прес-конференција на која поранешниот репрезентативец на „триколорите“ објави дека денешниот ден му е последен работен на „Сантијаго Бернабеу“.