Зинедин Зидан се врати на кормилото на Реал Мадрид по десет месеци од неговото заминување. Со „кралскиот“ клуб потпиша договор до 30 јуни во 2022 година, а сè уште актуелниот европски клупски шампион истакна дека Французинот ќе биде најплатен тренер во светот без притоа да истакне за која сума станува збор. Поранешниот фудбалер од средниот ред овојпат ќе добие одврзани раце од претседателот Флорентино Перез што го немаше во целост во претходниот мандат. Ова, според шпанските медиуми, значи дека ќе може сам да одлучува за изгледот на трансфер листата за летниот преоден рок, но и за трансферните цели за што се шпекулира дека располага со буџет од 300 милиони евра.
„Не должам ништо на Реал. Овде сум бидејќи сакам. Се вратив да му помогнам на клубот да се врати каде што му е место. Некои работи ќе се променат, но тие не се приоритет во моментот. Пред нас се 11 натпревари и преку нив ќе се обидеме да ја завршиме сезоната на добар начин. Тоа е идеја засега“, истакна Зидан.
Популарниот Зизу на промоцијата на „Сантијаго Бернабеу“ се појави во друштво на сопругата Вероника. Не сакаше премногу да коментира на прашања од типот кој ќе остане, кој ќе замине, а кој ќе биде ангажиран како освежување на екипата на лето. Не сакаше да говори и за евентуално враќање на Кристијано Роналдо, а на прашањето дали е можно Португалецот повторно да стане „крал“, тој одговори:
„Ќе видиме во јуни, сега не е време да зборуваме за тоа“.
Познато е дека Роналдо е во конфликт со Перез и го избегнува Мадрид, па, се чини, дека Зидан тешко ќе може да ги испегла разликите. Од друга страна, управата на Јувентус сигурно ќе бара преку 100 милиони евра колку што вложи за португалскиот репрезентативец и тешко дека ќе се откаже по само една сезона иако би заштедиле еден куп пари што моментно ги издвојуваат на негова плата.
Зидан е трет тренер на Реал Мадрид во оваа сезона во која влезе со Хулен Лопетеги. Но, екс шпанскиот селектор не се задржа долго, по 18 меча доби отказ, па кормилото есеноска му беше доверено на Сантијаго Солари. Но, и Аргентинецот доживеа, речиси, идентична судбина и покрај неодамна потпишаниот договор до 2021 година. За него се потврдија медиумските шпекулации што се појавија во текот на минатата недела дека мечот со Валјадолид ќе биде последен без оглед на исходот. Му пресудија елиминациите во полуфиналето во шпанскиот куп од Барселона и во осминафиналето во Лигата на шампиони од Ајакс.
Реал Мадрид е третопласиран во Примера со 12 бода помалку од Барселона на лидерската позиција на табелата. Првиот меч за Зидан по враќањето ќе биде во сабота (16.15 ч.) на домашен терен против Селта.
Во претходниот мандат на „Сантијаго Бернабеу“, Зидан го предводеше Реал Мадрид до три последователни титули во Лигата на шампиони, двапати го освојуваше Светското клупско првенство и по еднаш Примера, шпанскиот Суперкуп и Суперкупот на УЕФА.