Здружението на новинари на Македонија (ЗНМ) се приклучува кон иницијативата на Меѓународната федерација на новинари (МФН) и Европската федерација на новинари (ЕФН) против бранот на напади врз слободата на медиумите и човекови права во Турција.
Во Турција овие денови, по неуспешниот воен удар, беа уапсени 61 новинар и сопственици на медиуми.
ЗНМ денеска упати писмо до турскиот амбасадор во Скопје, Н.Е. Умур Шелендир, во кое изразува длабока загриженост за масовното затварање на медиуми и апсење на новинари, кое се случува во Турција, по обидот за воен удар.
Претседателот на ЗНМ Насер Селмани во ова писмо ја повикува турската влада да се воздржи од нови напади на медиуми и новинари.
„Веруваме дека вонредната состојба не треба да се користи како изговор за чистка во медиумите, како и во другите делови на општеството. Цензура на медиумите заради критики насочени кон владината политика е незаконска, дури и во вонредна состојба“, се вели во писмото.
ЗНМ, и сите членки на МФН и ЕФН ги повикуваат турските власти да ги почитуваат меѓународните конвенции за човековите права, социјалните права и слободата на говорот.
„Ве охрабруваме да ја негувате културата преку која во целост се почитува слобдата на печатот“, се истакнува во писмото.
ЗНМ испраќа и линк на кој се набројани имињата на затворените новинари и сопственици на медиуми.
Истовремено ЗНМ ја повикува македонската јавност да ја потпише петицијата на Амнести Интернешнел во која се бара заштита на слободата и демократијата во Турција.
Над 18.000 лица се уапсени од 15 јули по неуспешниот обид за воен удар, објави Ројтерс повикувајќи се на турското министерство за внатрешни работи во изјава дадена за јавниот ТВ сервис Хабер. Од оваа бројка, 9.677 лица се официјално во затвор и чекаат пресуда.
Во овие лица има новинари, универзитетски професори, членови на армијата или опозицонери кои се сомничат за врски со Фетула Ѓулен за кој власта вели дека е иницијатор на воениот удар.
Истовремено на 50.000 лица им беа одземени пасошите.