Здружението на новинари на Македонија денеска обвини дека Советот на Агенцијата за аудио и аудиовизуелни медиумски услуги најверојатно по нечиј диктат усвоил нов заклучок на Извештајот за работа на Агенцијата за 2016 годна и не ја прифатил констатацијата дека во неколку наврати на Сител и во емисијата на Миленко Неделковски се користел говор на омраза. Исто така не е прифатен заклучокот дека телевизиите „Алфа“ и „Нова“ на Сеад Кочан континуирано ги прекршувале професионалните стандарди.
„Советот на Агенцијата за аудио и аудиовизуелни медиумски услуги вчера го усвоил Извештајот за работа на АВМУ за 2016 година, изготвен од стручната служба, во кој на објективен начин се претставува работата на националните телевизии од изминатата година. Врз основа на мониторингот на програмата на националните телевизии, во извештајот се констатира дека во неколку наврати на ТВ Сител и во емисијата на Миленко Неделковски која се прикажуваше на ТВ Канал 5 се користел говор на омраза. Исто така, во извештајот се нотира дека има континуирано прекршување на професионалните стандарди од страна на ТВ Алфа и на ТВ Нова. Советот, наместо да го одобрат извештајот, усвоиле нов заклучок, кој не се базира со анализата на стручната служба на Агенцијата, туку на личното убедување на членовите: Лазо Петрушевски, Селвер Ајдини, Миљаим Фетаи и Алма Машовиќ дека ТВ Сител, ТВ Нова, ТВ Алфа, ТВ Канал 5, Телма, 24 Вести и ТВ Шења, биле политички пристрасни“, велат од ЗНМ.
На ваквите оценки на претседателот на Советот на Агенцијата Лазо Петрушевски се спротивставил Зоран Фиданоски, член на Советот, кој побарал да се одбие ваков заклучок.
„Овој став е политички мотивиран и со него се сака да се стави знак на еднаквост меѓу медиуми за кои во мониторингот не биле констатирани прекршувања на професионалните новинарски стандарди, со оние за кои има десетици пријави за прекршување на стандардите и констатиран говор на омраза“, рече Фиданоски, на денешната прес конференција на ЗНМ.
Фиданоски оцени дека Советот со ваквиот заклучок ја девалвира работата на стручната служба на Агенцијата и необјективно ја преставува работата на националните телевизии. Тој се сомнева дека ваквиот заклучок на Советот е донесен по нечиј политички диктат и е целосно спротивен на мисијата на Агенцијата.
Насер Селмани, претседателот на ЗНМ заклучокот на Советот на АВМУ го оцени како непримерен и непрофесионален.
Селмани побара од Собранието на Македонија да не го усвои Извештајот за работата и да го врати на доработка за да се избрише вештачки квалификацијата дека сите национални телевизии биле политички пристрасни.