Координаторот на седмата пратеничка група на ВМРО-ДПМНЕ, Димитар Стевананџија, побара пауза од еден час на самиот почеток на пленарната седница.
Претседателот на Собранието, Талат Џафери побара од Стевананџија да каже во име на кој политички субјект бара пауза и зошто бара пауза, на што тој немаше точен одговор, единствено кажа дека е координатор и дека Џафери е должен да ја овозможи паузата.
Следна точка на дневниот ред е разрешување на државниот обвинител, Марко Зврлевски. Оваа седница беше прекината во четвртокот, кога исто така координаторите на ВМРО-ДПМНЕ бараа паузи од по еден час со што оневозможија да продолжи работата на Собранието.
Опозицијата формираше 10 пратенички групи и така пратениците се расцепкаа при што сега не може да се предвиди кога ќе дојде на ред разрешувањето на Зврлевски, бидејќи секој од пријавените пратеници има право и на реплики и процедурални забелешки и гласањето за разрешувањето на Зврлевски може да се одолговлечи.
Според собранискиот Деловник, координаторите на пратеничките групи имаат право на дискусија од 15 минути и да побараат процедурална забелешка уште 3 минути.