Вкупно 150 граѓани учествувале во војните во Сирија и Ирак како припадници на паравоени фомрации. Од нив во земјава се вратени околу 80 лица, велат за НОВА ТВ од Министерството за внатрешни работи.
Генерално, според информациите на полицијата, нивните патишта до Сирија и Ирак минуваат преку Турција, по копнен или по воздушен пат. Пред да заминат, лицата посетувале верски предавања на радикални имами, некои се радикализирале преку интернет (социјални мрежи), а некои преку лични контакти од кои добиле и логистичка поддршка за нивно заминување и приклучување кон тамошните паравоени формации.
Од МВР за НОВА ТВ објаснуваат дека во моментов повратниците не минуваат низ организирани процеси за нивна ресоцијализација. Од страна на новоформираниот Национален комитет за спречување на насилен екстремизам и борба против тероризам, во тек е изготвување на две одделни национални стратегии за спротивставување на овие безбедносни појави, и на нивните акциски планови, во кои треба да бидат вклучени и програми/проекти за ресоцијализација на овие лица.
Од превентивен аспект, се врши постојан оперативен увид врз активностите на повратниците во земјава. Од нив, осудени се вкупно 17 лица и истите издржуваат казна затвор.
Еден од случаите беше и „Ќелија“ во кој беа уапсени и осудени 11 македонски државјани за учество во странски војски и паравоени формации. Пресудата беше донесена лани во мај, при што 6-мина од обвинетите по спогодба со обвинителството добија казни 5 години затвор, додека првобвинетиот, оџата од Чаир Мемиши Реџеп беше осуден на 7 години затвор за учество и организирање паравојска и регрутирање војници за борба во Сирија. Останатите 5-мина биле дел од групата која учествувале во логистика и организирање на војниците за борба во Сирија.
Според обвинението за овој случај, осудените во џамија во Скопје собирале верски материјали и
регрутирале војници кои биле испраќани на боиштата во Сирија и Ирак. Обвинителството тврдеше дека
со пим мерки обезбедило доволно докази кои го докажуваат делото за кое беа осудени.
Пред две недели Генералниот секретар на Регионалниот совет за соработка (РСС) Горан Свилановиќ, изјави дека „темпото на заминување на граѓаните од регионот се намалило во 2015 година, а речиси во целост е запрено во средината на 2016 година.
„Околу 1.000 поединци од Западен Балкан отпатувале во Сирија и Ирак од 2012 г. до 2017 г., околу 300 се вратени, околу 200 се убиени, а околу 400 се уште се наоѓаат таму“, рече Свилановиќ.
Тој соопшти дека од цела Европска унија на боиштата во овие две земји заминале околу 5000 граѓани.
За шест ипол години војна, во Сирија загинале над 340.000 луѓе
Повеќе од 340.000 лица загинаа во Сирија, од почетокот на конфликтот пред шест и пол години, соопшти Сирискиот центар за мониторинг на човековите права.
Невладината организација за мониторинг на човековите права со седиште во Велика Британија, која располага со широка мрежа на информатори во Сирија, ја документирала смртта на 343.511 лица од средината на март 2011 година до ноември 2017. Меѓу убиените 102.618 биле цивили, меѓу кои 19.000 деца и 12.000 жени.
Загинале повеќе од 119.000 борци од провладините сили. Меѓу нив има 62.000 сириски војници и 1.556 припадници на либанското шиитското движење Хезболах.
Убиени се околу 59.000 борци од бунтовнички групи и од Сириските демократски сили, курдско-арапска унија, поддржани од САД.
Загинале и повеќе од 62.000 џихадисти, вклучувајќи ги и припадниците на терористичката „Исламска држава“.