Повеќе западни разузнавачки служби ја ограничиле размената на чувствителни информации со Австрија од страв дека овие документи би можеле да завршат на масата на Владимир Путин, објави Вашингтон Пост минатата недела а овие вести денес ги пренесе и австрискиот весник Ди Пресе.
Власта веднаш ги отфрли овие обвинувања.
Сомнежите за преголемата блискост на рускиот претседател со партијата ФПО, австриската екстремна десница, која ја води земјата во коалиција со демо-христијаните, се зголемија со присуството на Путин на свадбата на австриската шефица на дипломатија Карин Кнејсл, член на ФПО.
Оваа партија во 2016 година склучи договор за партнерство со партијата на Путин, Обединета Русија.
Со влезот во владата ФПО доби значајни и стратешки места во австриската владечка коалиција. Освен надворешните работи, тие ги водат внатрешните работи и одбраната.
Сликите од свадбата, на која Путин танцува со Кнјесл, го обиколија светот додека австриската опозиција ја остро ја нападна владата поради оваа незгодна покана.
Според Ди Пресе, во февруари виенското седиште на Бирото за заштита на Уставот и за борба против тероризмот (БВТ), задолжено за внатрешната безбедност и контра разузнавање, бил направен претрес во текот на кој биле одземени чувствителни документи.
Познато е дека Австрија е неутрална земја и таму имаат седишта многу меѓународни организации како дел од Обединетите Нации, ОБСЕ, ОПЕП па така, Австрија секогаш била едно од важните места за разузнавачите од светот.
Во март, кога многу европски земји, како знак на солидарност, им откажаа гостопримство на руските дипломати во екот на скандалот со труењето на Скрипал, Виена тоа не го направи и изјави дека сака да ги одржи отворени каналите за комуникација со Русија.
Поради овие нови западни сомнежи за порозноста на австриското разузнавање, опозицијата вчера побара одржување на Советот за национална безбедност во наредните две недели.
Аугуст Ханинг, поранешниот шеф на германското разузнавње БНД, додаде уште масло на искрите и во германскиот весник Билд изјави дека “ако една служба не успева да ги заштити своите информации и изворите на своите сојузници, таа мора да биде третирана со претпазливост”. И додаде дека “тајната мора да биде гарантирана; но тоа е особено тешко со вакви инциденти како во Австрија”.
Тој сепак призна дека нема конкретни информации за австриската разузнавачка служба а актуелниот шеф на БНД Петер Гридлинг изјави дека соработката во сите клучни области добро функционира, особено во борбата против тероризмот.