Кривичен суд ги одби барањата на Специјалното јавно обвинителство за привремено замрзнување на имотот на ВМРО-ДПМНЕ, информираа преку соопштение од судот.
Барањата на СЈО, судиите ги разгледувале денеска на седница која не беше отворена за јавноста.
„Судиите од Кривичните совети на Одделението за организиран криминал и корупција при Основен суд Скопје 1 – Скопје, постапувајќи по несогласноста на судиите на претходна постапка, во врска со барањата за привремено одземање на имот поднесени од страна на Јавното обвинителство за гонење на кривични дела поврзани и кои произлегуваат од содржината на незаконското следење на комуникациите (СЈО), на нејавна седница одржана на 23.05.2017 година согласно чл.202 ст.3 од ЗКП донесоа решенија со кои се уважува несогласноста на судијата на претходна постапка при што од страна на судот не е определена предложената привремена мерка Забрана на оттуѓување на недвижен имот со ставање на хипотека“, пишува во соопштението на судот.
Во случајот „Талир“, кој вчера го презентираше СЈО, 11 лица од партијата, Никола Груевски, Илија Димовски, Иво Котевски, Емил Димитриев, Кирил Божиновски, Мартин Протуѓер и Даниела Рангелова се сомничат дека преку незаконско купување имот переле пари за партијата. СЈО најави дека ќе побара замрзнување на имотот на партијата.