Рома и нејзините навивачи се збогуваа со Франческо Тоти. Легендарниот капитен на „волчицата“ стави крај на фудбалската кариера што траеше 25 години и сите ги мина на „Олимпико“. Прошталниот меч го одигра против Џенова во последното коло во Серија А во сезоната, дебитантскиот за првиот тим го забележа на гости кај Бреша во 1993 година.
Лучано Спалети ги испрати на терен во 54 минута на местото на Мохамед Салах, не постигна гол, но неговата, како што го нарече клубот, љубов победи на крајот со 3:2 и заврши на второто место на табелата и обезбеди директен пласман во Лигата на шампиони наесен.
Тоти доби спектакуларното збогување на распродадениот фудбалски храм во Рим кој потона во емоции и солзи што не можеше и самиот да ги запре по означувањето на крај на средбата на судијата Паоло Талјавенто. Претседателот Џејмс Палота му врачи врамен дрес со златна бројка 10, наследникот со капитенската лента Даниеле де Роси му подари сувенир со изгравирани потписи на сите клупски колеги, а од публиката овации, аплаузи, песна и скандирање на неговото име.
Во друштво на сопругата Илари Бласи и трите деца Кристијан, Шанел и Изабел направи почесен круг по атлетската патека на стадионот притоа поклонувајќи се пред секоја трибина по неколкупати. Пред онаа со најверните фанови на римјаните потпиша топка што ја упати во голмански стил кон нив.
„Луѓето често ме прашуваа – зошто го мина целиот живот и кариера во Рома? – Рим за мене е светот. Овој клуб, овој град се за мене живот“, рече Тоти во дел од обраќањето пред гледачите од центарот на „Олимпико“.
Кариера со бројки за респект има Тоти зад себе. Во Серија А настапи во 618 средби во кои постигна 250 гола, во Купот на Италија заигра 59 пати што ги зачини со 18 погодоци, има пет натпревари и реализација и во италијанскиот Суперкуп. Тоа е што се однесува до домашните фронтови. Стрелец е на 17 гола во 57 меча во Лигата на шампиони (ЛШ) и уште на 21 во 46 учества во Лига Европа/Куп на УЕФА. Или севкупно одиграни 785 средби и постигнати 307 гола.
Со Рома освои само едно Скудето во изминатите 25 сезони. Драгоцениот трофеј го подигна во 2001 година. Од активното бавење со најважната споредна работа во светот заминува како најдобар стрелец во градските дуели со Лацио со 11 гола, како прв играч што погодувал во 23 изданија на калчолигата во низа и како фудбалер со најдолг стаж во Серија А. Во 46 меча постигнуваше по два погодока што исто така не му успеало на никој претходно, а со 38 години и 59 дена е највозрасен стрелец во ЛШ.
Тоти беше дел од генерацијата на италијански репрезентативци кои ја освоија титулата на Светското првенство во Германија во 2006 година. На мундијалите одигра 11 меча во кои реализира еднаш, во квалификациите за нив се запишуваше во листата на стрелци четири пати во 13 наврати.
Впиша еден гол во седум квалификациски дуели за Европските првенства, во нив, пак, прослави два гола во шест меча. За „азурите“ настапи и во 21 пријателски натпревар во кои еднаш ја тресеше мрежата на противникот.