Вардар е сукцесор на Кјелце на тронот во Лигата на шампиони на ЕХФ. „Црвено-црните“ по голема борба во финалето во Келн го совладаа ПСЖ со 24:23 за најголемиот успех во клупската историја и воопшто на македонскиот машки ракомет. Тимот од СЦ „Јане Сандански“ е 13 клуб што успеал да ја понесе престижната трофеј во елитното европско натпреварување, но и шести различен во последните шест сезони. Македонија, пак, е шеста држава на континентот што од денеска може да се пофали со титулар во ЛШ за мажи по Шпанија, Германија, Франција, Словенија и Полска.
Ако синоќа беше урната Барселона со голот на Лука Циндриќ, вечерва е покорена Европа со голот на Иван Чупиќ. Хрватскиот репрезентативец ја презеде одговорноста во нападот што траеше седум секунди, доби топка од Душебаев, влезе од својата крлна позиција крај Геншајмер и го совлада Омејер за задржување на трофејот што минатата сезона го освои со Кјелце.
Вардар ниту во финалето не оддаде впечаток дека е дебитант на завршните турнири во Лигата на шампиони. Речиси деноноќие по големата победа над големата Барселона, македонскиот првак храбро излезе на мегдан со уште еден ѕвезден европски состав и уште од првата минута сакаше да даде до знаење по што замина во Келн. Почна, играше и финишира во стил на клуб со шампионско педигре во елитата на стариот континент и како да има минато низ огромен број одиграни финални мечеви.
Не само што беа рамноправен партнер на „светците“ во воведните 30 минути туку во најголем дел од нив и водеа со два разлика (4:2, 5:3, 6:4, 7:5, 8:6, 9:7, 10:8), а во мал период им бегаа и три чекори на парижаните. Контролата на семафорот ја имаа до финишот на првиот дел во кој францускиот состав со серија од 3:1 замина на одмор со гол предност (12:11).
Вардарци останаа цврсто на земја и по враќање од солекувалната. Ја задржаа цврстината во одбрана, со мобилност во нападот го задржаа и солидното ниво на реализација (велиме солидно ако се има предвид дека на голот на ПСЖ е легендарниот Омејер, а пред него и „ѕид“ од високи и корпулентни играчи). Дочекаа на прослават и два гола од својата половина (Шишкарев и Абутовиќ) во ситуации по загубени топки на „светците“ без голман меѓу стативите. На крајот, по голот на Хрватот, дочекаа да прослават и севкупен триумф во Келн што ќе биде запишан со златни букви во македонската спортска историја.
Најефикасен во финалето беше Тимур Дибиров со седум гола, Чупиќ, Циндриќ и Борозан постигнаа по три, меѓу стрелците се додадоа и Душебаев (2), Кањелјас (2), Шишкарев (2), Абутовиќ (1) и Марсениќ (1). Фантастичен беше Арпад Штербик кој на крајот го понесе и признанието МВП на завршниот турнир во шампионската лига. Најмногу голови за поразената екипа даде Никола Карабатич (5).
ПСЖ – Вардар 23:24 (12:11)
Сала: „Ланксес“ арена во Келн. Гледачи: 18.000. Судии: Ларс Гепел и Маркус Хелбиг.
ПСЖ: Омејер, Шкоф, Геншајмер 2, Мелгард, Акамбре, Степанчиќ 2, Конку, Бараше, Ремили 3, Абало 3, Л. Карабатиќ, Хансен 4, Нарсис 4, Нилсен, Н. Карабатиќ 5, Наи. Тренер: Звонимир Сердарушиќ.
Седмерци: 2/3. Исклучувања: 8 минути. Технички грешки: 5
Вардар: Штербик, Милиќ, Стоилов, Фереира Мораеш, Македа, Деревен, Карачиќ, Душебаев 2, Абутовиќ 1, Кањелјас 2, Циндриќ 3, Чупиќ 3, Дибиров 7, Шишкарев 2, Борозан 3, Марсениќ 1. Тренер: Раул Гонзалез.
Седмерци: 2/2. Исклучувања: 8 минути. Технички грешки: 3.