Вардар посакува, пред се, добра игра за резултат што ќе биде предуслов за уривање на проклетството на македонски претставник во фудбалската Лига на шампиони (ЛШ) што трае повеќе од една деценија и се однесува на минување на квалификациска препрека. По АПОЕЛ (сезона 2015/16) и Динамо Загреб (сезона 2016/17), „црвено-црните“ вечерва (19 ч.) на „Сведбанк“ арена во Малме му гостуваат на истоимениот домаќин во првиот меч од второто филтер коло.
Тренерот Гоце Седлоски изрази респект за Малме, но истовремено порача дека вардарци пристигнаа на самиот шведски југ по исход за активен реванш на „Младост“ во Струмица и добивање на двомечот со клубот што беше лансирна рампа за Златан Ибрахимовиќ.
„Тука сме за добар резултат. Подготвени сме за предизвикот што нè очекува. Ќе играме, веројатно, пред полни трибини што ќе бидат од големо значење за противникот, но имаме и ние репрезентативци со многу настапи во нозете пред голем број гледачи. Последните две годин бевме блиску да минеме преку второто коло меѓутоа не успевавме. Ова е трета шанса за, конечно, да одиме натаму. Имаме голем респект за Малме. Ова е, сепак, само прв натпревар. Двомечот ќе биде решен во реваншот“, изјави Седлоски на официјалната прес-конференција пред вечерашниот меч.
Три победи, седум реми и десет порази и билансот на Вардар во досегашните 20 одиграни средби во ЛШ и поранешниот Куп на европски шампиони. Вкупната гол-разликата е негативна и гласи 23:34, биланс што се очекува да биде поправен низ двомечот со Малме.
Правда на „Сведбанк“ во Малме вечерва ќе дели судиски тим од Исланд на чело со Торвалдур Арнасон. Негови асистенти ќе бидат Јохан Гудмундсон и Гилфи Мар Сигурдсон.
Лига на шампиони/квалификации/2 коло, први мечеви
Денеска играат
Спартакс Јурмала (Летонија) – Астана (Казахстан)
АПОЕЛ (Кипар) – Диделанд (Луксембург)
Хапоел Бер Шева (Израел) – Хонвед (Унгарија)
Малме (Шведска) – Вардар (Македонија)
Шериф Тираспол (Молдавија) – Кукс (Албанија)
Зрињски (БиХ) – Марибор (Словенија)
БАТЕ Борисов (Белорусија) – Алашкерт (Ерменија)
Мариехам (Финска) – Легија Варшава (Полска)
Жалгирис (Литванија) – Лудогорец (Бугарија)
Жилина (Словачка) – Копенхаген (Данска)
Дандалк (Република Ирска) – Розенборг (Норвешка)
Хафнарфјордур (Исланд) – Викингур (Фарски Острови)