Премиерот Зоран Заев претпладнево се сретна со амбасадорката на Србија во Македонија Душанка Дивјак – Томиќ, на која како што се истакнува во соопштението заеднички е констатирано дека меѓу двете држави постои искрено пријателство и реални основи за продлабочување на односите меѓу двете пријателски земји.
-Владата на Република Македонија е определена да развива доброседски односи и низ прокативната улога во регионалната соработка да придонесе кон евро-атлантските перспективи на целиот регион. Република Србија е традиционален пријател на Република Македонија и насочени сме само кон позитивни односи што ќе придонесат и во билатералните односи и на регионален план, рече премиерот Заев.
Српската амбасадорка Дивјак – Томиќ изрази благодарност за конструктивноста на премиерот Заев во унапредувањето на соработката помеѓу Македонија и Србија, за што се веќе договорени официјална посета на премиерот Заев на Србија, заеднички состанок на двете влади, конкретни чекори во областа на економијата, како и за неговите заложби, потврдени и во телефонскиот разговор со српскиот претседател Александар Вучиќ, низ искрен и отворен пристап да се решаваат сите отворени прашања.
-Пренесувам позитивна и конструктивна атмосфера од Србија за натамошна блиска соработка. Исто така премесувам и благодарност за поддршката од Владата на Македонија, седиштето на Транспортната заедница да биде во Белград. Тоа што генералниот секретар на Транспортната заедница е од Република Македонија е само потврда за определбата од двете страни, за негување и развивање на нашите пријателските односи, рече амбасадорката Дивјак – Томиќ.
На средбата е договорено да се направи рекапитулар на потпишаните, а досега нереализирани документи за соработка помеѓу двете држави и да се пристапи кон нивна скорешна имплементација, се вели во соопштението.
Дипломатскиот спор кој започна со повлекување на персоналот од Амбасадата на Србија во Скопје на 20 август, траеше 48 часа, а се однесуваше на наводно прислушување на Амбасадата и персоналот, беше решен со директни разговори меѓу претседателот на Србија и премиерката на Србија Александар Вучиќ и Ана Брнабиќ со македонскиот премиер Зоран Заев, и со средбата на министрите за надворешни работи Никола Димитров и Ивица Дачиќ.