Денеска е последниот ден од расправата по предлог законот за употреба јазиците во Комисијата за европски прашања, за кога се најавени завршни обраќања на координаторите на четирите најголеми парламентарни групи во Собранието, по што ќе се гласаа.
За време на претходните два дена, се водеше жестока дебата меѓу власта и опозицијата за потребата од овој закон, за тоа дали треба или не тој да има европско знаменце и дали тоа ја загрозува позицијата на македонскиот, како официјален јазик во земјата.
Според опозицијата тој е единствено потребен за да се воспостави новата владина коалиција и со него се продлабочува јазот меѓу Македонците и Албанците, бидејќи со него се унапредуваат само правата на Албанците и тоа на штета на другите, сметаат од опозициската ВМРО-ДПМНЕ.
Тие тврдеа дека е злоупотребено европското знаменце за да се забрза носењето на како што велат „неуставен“ законот. Тие сметаат дека е потребна поширока дебата во јавноста за ова законско решение.
Од владејачка СДСМ пак, тврдат дека законот не задира во унитарноста и дека во Македонија постои политички консензус дека не треба да се менува карактерот на државата, додека пак изјавите за кантонизација или федерализација се само политикантски изјави со кои може да се повтори 27 април.
И премиерот Зоран Заев и вицепремиерот за евроинтеграции Бујар Османи истакнаа дека овој закон е дел од Рамковниот договор, кој пак е поврзан со евроинтеграциите и со неговото донесување се затвора последното отворено прашање од него.
Со законот се предвидува доследно спроведување на одредбите од Рамковниот договор во делот на употребата на јазиците, особено на оној што го зборуваат 20 проценти од граѓаните на Република Македонија и неговото писмо (албанскиот јазик).