Принципиелен став на Единсон Кавани или обид да искамчи некое евро повеќе од богатите газди на ПСЖ. Весникот „Ел Паис“ пишува дека Уругваецот наводно одбил потенцијален бонус што е надвор од неговиот договор со „светците“. Претседателот на клубот Насер Ал-Келаифи му понудил еден милион евра на напаѓач под два услова. Првиот е да го препушти изведувањето на пенали на Нејмар, а притоа да биде и прв стрелец во француската Лига 1 на крај на сезоната.
Богатата понуда на Ал-Келаифи е продолжение малиот „судир“ меѓу Кавани и Нејмар околу изведување на најстрогата казна во мечот против Олимпик Лион. Шпанските медиуми притоа наведуваат дека Уругваецот ја има поддршката од мнозинството соиграчи во ПСЖ да продолжи и во иднина да шутира од белата точка, но стравувајќи од можно нарушување на атмосферата во соблекувалната, претседателот на клубот одлучи да го решава проблемот со пари. Засега, се чини, залудно.
Доколку проработи егото и ситуацијата излезе од контрола, главоболки ќе има и менаџерот Унаи Емери кој наместо фантастичен офанзивен тандем од 250 милиони евра, ќе треба да посредува за надминување на проблемот со цел да не се одрази врз играта и резултатите.