Благој Милевски останува на кормилото на младата фудбалска репрезентација на Македонија и во наредните две години. Предводникот на последната генерација во У21 што го направи најголемиот успех со пласманот на Европското првенство во Полска ја продолжи соработката со Фудбалската федерација на Македонија (ФФМ) до 2019 година и покрај неколкуте понуди за ангажман во странство.
„Уште две години ќе бидеме заедно. Имав понуди од странство, но моја проценка е дека не е моментот да заминам сега“, истакна Милевски.
Милевски го соопшти и списокот на фудбалери за претстојните дуели против Србија (6 октомври во Скопје) и против Гибралтар (10 октомври во Португалија). Покани се упатени до 22 играча од кои двајца (Елиф Елмас и Никола Ѓорѓев) ќе играат само во мечот против северниот сосед за потоа да бидат отстапени на селекторот Игор Ангеловски во А тимот за дуелот со Луксембург во квалификациите за СП 2018. Дебитантска доби Душан Ѓорѓев кој брани за екипата на Оклахома во САД.
„Пред нас е Србија, селекција која, според мене, е фаворит во групата за пласман на завршниот турнир. Има поединци кои настапуваат во најсилните европски лиги како Јовановиќ, Груиќ и Гаиќ и ќе мора максимално сериозно да ѝ пристапиме. Системот на игра го немаат променето од Европското првенство во Полска. Но, квалитет покажавме и ние во изминатиот период и верувам дека соодветно ќе одговориме на предизвикот“, нагласи селекторот.
Собирот на младата селекција е закажан на 1 октомври кога ќе биде одработен и првиот тренинг. Мечот со Србија е пет дена подоцна на тренинг комплексот „Петар Милошевски“ при ФФМ. Македонија одлично го започна новиот циклус со триумф на гостувањето во Ерменија со 3:0.
Список на фудбалери во младата репрезентација за дуелите со Србија, односно, Гибралтар во квалификациите за ЕП 2019
Голмани
Филип Илиќ (Ганѕасар/Ерменија)
Боби Целески (Македонија Ѓорќе Петров)
Душан Ѓорѓев (Оклахома/САД)
Одбрана
Давид Атанаскоски (Академија Пандев)
Алекс Симоски (Акрополис/Шведска)
Костадин Чешмеџиев (Академија Пандев)
Алекса Амановиќ (Јавор/Србија)
Јован Попзлатанов (Пелистер)
Стефан Костов (Ренова)
Бесарт Кривањева (Шкупи)
Среден ред
Лиридон Иљази (Ренова)
Тихомир Костадинов (Ружомберок/Словачка)
Енур Тотре (Шкендија)
Давор Здравковски (АЕЛ/Кипар)
Никола Кулески (Сиднеј/Австралија)
Елиф Елмас (Фенербахче/Турција)
Напад
Петар Петковски (Вардар)
Емил Абаз (Спартак Суботица/Србија)
Бобан Георгиев (Силекс)
Селмани Ремзифаик (Ујпешт/Унгарија)
Даниел Крезиќ (Одеволд/Шведска)
Никола Ѓорѓев (Твенте/Холандија)