Новото раководство на Општина Аеродром го раскинало договорот за изградба на тениски игралишта со компанијата „Теннис парк“ склучен од претходното раководство.
„ Договорот за изградба на тениски игралишта со компанијата „Тенис парк“, во сопственост на Самсоненко, не е во интерес на граѓаните. Договорот предвидува Општината и Градот Скопје целосно да го ослободат инвеститорот од плаќање комуналии, а притоа граѓаните да добијат многу мали бенефиции за користење на игралиштата. Според Договорот, граѓаните би можеле бесплатно да користат само едно игралиште и тоа во ограничено време, додека комуналиите од кои се ослободува инвеститорот се во висина од еден милион евра. Инвеститорот го добива земјиштето на користење 35 години“, пишува во соопштението на Општина Аеродром.
Во претстојниот период Општината ќе донесе одлука како понатаму ќе се искористи овој простор.
Според официјалните податоци од Централниот регистар, Сергеј Самсоненко, има 30-тина фирми во Македонија. Тој тука живее веќе 11 години. Македонската јавност го запозна како газда на обложувалниците „Бетсити Балкан“, откако есента 2006 година одлучи да се пресели во Скопје заедно со семејството.
Откако Самсоненко е на македонско тло, неговата бизнис-империја постојано се шири. Тој пред три години ги презема женскиот и машкиот ракометен клуб Вардар, а стана доминантен сопственик и на истоимениот фудбалски клуб.
Тој го градеше новиот спортски центар „Јане Сандански“ во скопската населба Аеродром.
На местото на старата спортска сала „Јане Сандански“, на парцела од 11.000 квадратни метри, Самсоненко изгради нов спортскиот центар, кој содржи голема арена, со капацитет од 6.500 гледачи и една помала сала, која собира 1.000 посетители. А, дел од целиот проект е и новиот хотел „Русија“.
На градежниот плац веднаш до спортскиот комплекс „Јане Сандански“, Самсоненко ја гради руската црква „Св. Троица“.
НОВА ТВ направи повеќе истражувања за бизнисите на Самсоненко и неговата поврзаност со фирми од земји во даночните раеви Кипар и Белизе, кои се јавуваат во бизнис зделките во кои тој се јавуваше како инвеститор.
Русинот Самсоненко во приказната „Инвест ин Маседониа виа Белизе“