Околу седум илјади Романци вечерва протестираат на плоштадот „Победа“ во Букурешт против централно-левичарската Влада во Романија.
Поради последните политички случувања, протести се одржуваат во стотина градови во Романија, како и меѓу дијаспората.
Како што наведува агенцијата БТА, повикувајќи се на романската интернет страница „Зиаре“, незадоволството е предизвикано од промените во даночното законодавство и планираните промени во правосудното законодавство кои, според аналитичарите, ќе ја ослабнат борбата против корупцијата.
На протестите на граѓанското општество се приклучија опозициските партии, како и двата големи синдиката – Блокот на националниот синдикат и Картел Алфа. Двете синдикални организации ќе организираат протест и на 12 декември во Букурешт.
Во романскиот главен град планиран е и протестен марш. Се очекува демонстрантите вечерва да заминат и пред зградата на Парламентот.
Протести денеска организира и романската дијаспора во Амстердам, Бирмингем, Минхен и Цирих.