Основното јавно обвинителство за гонење на организиран криминал и корупција донесе Наредба за спроведување на истражна постапка против триесет и шест лица поради основано сомнение за сторено кривично дело Терористичко загрозување на уставниот поредок и безбедноста од член 313 од Кривичниот законик, се вели во соопштението од ОЈО.
Денеска во Кривичниот суд пред истражен судија за настаните кои се случија во Собранието на 27 април се изведени десетина лица одговорни за организирање и помагање на настаните.
Меѓу приведените е и поранешниот министер за внатрешни работи и ексдиректор на Бирото за јавна безбедност Митко Чавков, други припадници на МВР, неколку јавни личности и актери и пратеници.
Приведени се и пратениците Крсто Мукоски, Сашо Василевски и Жаклина Стефановска, а се уште се трага по други лица кои помагаа во извршување на делото.
Според член 53 од Деловникот на Собранието од денот на верификација на мандатот, пратениците уживаат имунитет. Како што предвидува ставот 2 од овој член, надлежниот орган може да поднесе барање за одобрување на притвор за пратеник.
„Известувањето дека пратеникот е притворен затоа што е затечен во вршење кривично дело за кое е пропишана казна затвор во траење од најмалку пет години, надлежниот орган го поднесува до претседателот на Собранието. (4) Надлежниот орган го известува претседателот на Собранието за притворот на пратеникот и кога тој не се повикал на имунитетот. (5) Претседателот на Собранието, барањето за одобрување на притвор, односно известувањето дека пратеникот е притворен веднаш го доставува до Комисијата за деловнички и мандатно-имунитетни прашања. Комисијата е должна да го разгледа барањето, односно известувањето и во рок од два дена да достави извештај до претседателот на Собранието. (6) За седницата на Комисијата се известува и пратеникот на кого се однесува барањето. Врз основа на извештајот на Комисијата за деловнички и мандатно- имунитетни прашања, Собранието најдоцна во рок од три дена од добивањето на барањето за притвор на пратеникот, одлучува по барањето. (2) По известувањето за притворање на пратеник кој не се повикал на имунитет, Собранието може да одлучи да се примени имунитет над пратеник, ако тоа е потребно за вршење на функцијата пратеник“, пишува во Деловникот на Собранието.
Претседателот на Собранието, Талат Џафери во изјава за МИА вели дека доколку до него биде доставено барање од соодветна надлежна институција од судската власт тој не можае да избира меѓу тоа дали ќе постапува или не, затоа што како претседател на Собранието мора веднаш да ја препрати до Комисијата за деловнички и мандатно имунитетни прашања која е надлежна да расправа за барањето.
Џафери вели дека како претседател на Собранието нема намера да ја коментира одлуката и надлежноста на соодветното Обвинителство по однос на наредбите што тоа ги издаде.
„Во контекст на процедурите кои се пропишани со Устав и со Деловникот за работа на Собранието, сметам дека има дилеми по однос на почитувањето или непочитувањето докрај на соодветната процедура апропо одредбите од член 64 од Уставот каде е стриктно прецизирано дека пратеник не може да се лиши од слобода без одобрение на Собранието. Оваа одредба потоа ја прецизира Деловникот во деловите од членот 53 до 59 во сите аспекти на спроведувањето на таа одлука на Обвинителството. Во тој контекст сметам дека не се докрај испочитувани процедурите“, изјави претседатело на Собранието Талат Џафери.
Претседателот на Комисијата за деловничко и мандатно-имунитетни прашања Павле Богоевски денеска изјави дека до овој момент до Собранието на Република Македонија не е пристигнат никаков допис од Судот со барање за повлекување на имунитет на пратеници.
Според него, седницата на Комисијата би се одржала дури и без присуство на опозицијата бидејќи владејчкото мнозинство има доволно пратеници за кворум за работа.
– Веднаш штом ќе пристигне таков допис јас ќе ја закажам седницата на Комисијата, изјави Богоевски.
Според процедурата, како што појасни тој, барањето прво треба да се достави до претседателот на Собранието.
Обвинителството предистражната постапка против 36 лица ја води според членот 313 од Кривичниот законик за ова дело предвидува најмалку 10 години казна затвор.
„Тој што со намера да го загрози уставниот поредок или безбедноста на Република Македонија ќе предизвика или сериозно ќе се закани со предизвикување експлозија, пожар, поплава или друго општоопасно дејствие или акт на насилство, создавајќи чувство на несигурност или страв кај граѓаните, ќе се казни со затвор најмалку десет години“, пишува во членот 313.
ВМРО-ДПМНЕ преку соопштение ги повика сите членови и симпатизери на партијата и сите граѓани кои не се согласуваат со антидржаната политика на владеачката хунта да излезат на протест пред основниот суд Скопје во 13:30 часот.