Централниот комитет на ВМРО-ДПМНЕ на седница која ќе се одржи денеска на пладне треба формално да ја потврди одлуката за вонреден конгрес на партијата на 23 декември што ќе се одржи во Валандово, на кој треба да се констатира оставката на Никола Груевски и во тој случај да се избере нов претседател.
Од утрешната седница на ЦК не се очекуваат драматични одлуки, туку само формално да се потврдат одлуките на Извршниот комитет. Се очекува Груевски и пред членовите на ЦК да ја образложи оставката, што ја најави во интервју за партискиот портал Курир на 1 декември. Доколку 130 членови на ЦК ја прифатат, тогаш се отвора патот за вонреден конгрес на 23 декември.
Груевски ќе поднесе оставка од лидерската позиција на ВМРО-ДПМНЕ
Во однос на кандидатите за лидерската позиција во опозициската партија, досега официјално ја потврди само Филип Петровски. Во јавноста цело време се шпекулира со имињата на најблиските соработници на Груевски: Антонијо Милошоски, Никола Попоски и Илија Димовски, кој последниве месеци помалку е присутен на јавните настапи на партијата, освен во Парламентот. Како име кое е посакувано и од актуелниот лидер Груевски долго време се споменува генералниот секретар, Христијан Мицковски, кој и самиот на неодамнешната прес конференција не исклучи таква можност.
Ветеранот на ВМРО – ДПМНЕ, Димитар Димитров, во колумна за порталот „Призма“, насловена „И конгресот е Груевски“, меѓу другото, пишува дека Конгресот ќе го избере Груевски, независно дали под тоа или под некое друго презиме. Новиот лидер, кој и да биде тоа, ќе биде пред предизвикот да го демантира Димитров.
На вонредниот конгрес учествуваат делегатите од последниот редовен конгрес од 2015 година од Куманово кога беа одредени 560 делегати. Во нивни раце ќе биде изборот и на нов претседател на ВМРО-ДПМНЕ.
Кандидатура за претседател може да поднесе секој што има поддршка од 30 делегати на Конгресот. Ќе биде избран ако за него гласаат половината од 560 делегати.