Екс премиерот и лидер на ВМРО-ДПМНЕ, Никола Груевски денеска задоцни 15 минути на судењето за случајот на СЈО, „Траекторија“, кое требаше да започне во 9.45 минути.
На денешното судско рочиште присутни се поранешниот вицепремиер Владимир Пешевски, поранешниот министер за транспорт и врски Миле Јанакиески и поранешниот директор на Агенцијата за државни патишта, Љупчо Георгиевски.
Груевски, Пешевски, Јанакиески и Георгиевски се товарат дека во втората половина на 2012 година и во текот на 2013 година презеле повеќе дејствија со кои во постапката за избор на компанија за изградба на автопатните делници Миладиновци – Штип и Кичево – Охрид ги пречекориле своите овластувања. Со тоа тие нанеле штета на државниот буџет од најмалку 155.117.172 евра, а на компанијата изведувач и овозможиле да се стекне со имотна корист. Предметот стана познат како „кинески провизии“.
Петчлениот судечки совет го одби барањето на адвокатот на Груевски денешната расправа да биде одложена поради тоа што немало услови за визуелно и тонско снимање поврзано со АКМИС системот.
Исто така, адвокатите бараат одложување на главната расправа поради потребата од увид.
Но, обвинителката од СЈО Лиле Стефанова рече дека сите докази им се доставени на ЦД дури во два наврати за време на истрагата за случајот, а од „бомбите“ имаат транскрипти. Ако сакале да ги слушнат, рече Стефанова, можеле да побараат од судот да им овозможи да го направат тоа во просториите на судот откако е поднесено обвинението, а имале можност тоа да го направат и за време на истражната постапка кога СЈО им доставувала покани.
Се работи за вкупно 315 телефонски разговори и СМС пораки кои се дел од доказите на СЈО во овој предмет. Најголем дел од нив не се објавени во јавноста.
Девет рочишта за оваа недела
Денеска рочиште треба да се одржи и за насилствата во општина Центар во кој се обвинети 14 лица за поттикнување на насилството што се случи при протестите пред општина Центар во јуни 2013 година.
На претходните рочишта, вина за настаните пред општина Центар во јуни 2013, признаа четвртообвинетиот Томислав Лазаров и петообвинетиот Јордан Ристевски. Во овој предмет обвинети се уште 12 лица, меѓу кои лидерот на ВМРО-ДПМНЕ Никола Груевски, поранешниот министер за транспорт и врски Миле Јанакиески и пратеничката на ВМРО-ДПМНЕ Даниела Рангелова.
Тие се осомничени дека во втората половина на 2012 година и во текот на 2013 година презеле повеќе дејствија со кои во постапката за избор на компанија за изградба на автопатите Миладиновци – Штип и Кичево – Охрид ги искористиле и пречекориле своите овластувања. Со тоа, според СЈО, му нанеле штета на државниот буџет од најмалку 155 милиони евра и за истиот износ на компанијата изведувач ѝ овозможиле да се стекне со имотна корист.
За утре е закажано рочиште за случајот „Тарифа“ во кој се обвинети три лица поради постоење основано сомнение дека е извршена злоупотреба на службената положба во постапка по јавна набавка на софтвер – ЕРП Систем за потребите на АД ЕЛЕМ.
В среда, на 20 декември, треба да се одржи судење за предметот „Сопот“, кој е отворен во 2003 година кога двајца полски војници и еден македонски државјанин загинаа кога теренско возило на НАТО нагази на мина. Во овој случај десет лица се товарат дека во 2003 година подметнале експлозивна направа на локалниот пат Сушево-Сопот.
Во четврток и петок се закажани рочишта за предметот „Труст“ во кој првоосомничен е бизнисменот Сеад Кочан и уште две физички и три правни лица, меѓу кои и управителите на фирмите „Трансмет“, „Силекс“ и „Вато“ ДООЕЛ, за учество на тендер на Електрани на Македонија. Според обвинението, осомничените со фалсификувани документи местеле тендери во ЕЛЕМ во вредност од 17 милиони евра.
Ново рочиште за случајот „Топлик“ во кој осомничени се шест лица, меѓу кои и поранешниот министер за транспорт и врски Миле Јанакиески за продажбата на градежна парцела за изградба на населбата Сончев град во скопско Сопиште е закажано за во четврток, на 21 декември.
Во петок, на 22 декември пак треба да се одржи рочиште за предметот „Таргет – Тврдина“ во кој се обвинети поранешниот началник на Петтата управа во МВР Горан Грујевски и вработениот во УБК Никола Бошкоски, кои се во притвор во Грција, како и поранешната министерка за внатрешни работи Гордана Јанкулоска, поранешниот директорот на УБК Сашо Мијалков и шефот на кабинетот на Мијалков, Тони Јакимовски.