Европската унија (ЕУ) строго го осуди убиството на лидерот на партијата Граѓанска иницијатива „Србија, демократија, правда“ (СДП) Оливер Ивановиќ што се случи утринава во Косовска Митровица и очекува дека косовските власти брзо ќе успеат да ги најдат убијците и да ги изнесат пред обвинител.
“Ние очекуване дека косовските власти за спроведување на владеење на правот нема да штедат напор за да ги најдат убијците и да ги изнесат пред правдата без одлагање. ЕУЛЕКС ќе им даде поддршка на властите во согласност со неговиот мандат”, вели ЕУ преку соопштение.
Во Брисел се исто така загрижени од можните последици на ова убиство врз косовското општество и бараат од сите граѓани и политички партии да бидат смирени и да и дозволат на правдата да ја заврши својата работа.
Делегацијата на Белград го напушти техничкиот дијалог и се враќа во Србија поради убиството Оливер Ивановиќ.
Претседателот на Србија, Александар Вучиќ ќе се обрати на јавноста во 13 часот, по седницата на Советот за национална безбедност.
Оливер Ивановиќ е застрелан утрово во Косовска Митровица.
Ивановиќ бил застрелан утрово во 8.15 часот додека влегувал во просториите на неговата партија. Според косовските медиуми, во Ивановиќ било пукано со 4 куршуми во градите.
Неодамна во Северна Митровица беше запален автомобилот на Ивановиќ.
Оливер Ивановиќ, на изборите на Косово, беше носител на листата на „Слобода, демократија правда“, а на последните локални избори на Косово, на 22-ри октомври, 4-ца кандидати од неговата листа се повлекоа од изборите поради заплашување.
Во 1999 година Ивановиќ беше избран за претседател на Извршниот одбор на Српскиот национален совет за северно Косово, по што во 2001 година е именуван на шеф на Службата за економски развој при српскиот владин Координативен центар за Косово и Метохија.
Од 2008 до 2012 година беше државен секретар во српското Министерство за Косово и Метохија, по што ја формира партијата СДП.