По одличните настапи во првиот круг од Европското Првенство во ракомет, Македонија денеска се соочуваат со нов, уште поголем предизвик со кој ја почнува битката за освојување на едно од првите две места во групата.
На ред е гигантот Шпанија.
Задачата за македонските репрезентативци ќе биде исклучително тешка, бидејќи Шпанија е репрезентација од самиот европски врв и тим кој се вбројува меѓу најсериозните кандидати за освојување на трофеј.
На голот имаме дуел на двајцата голмани на Барселона, Борко Ристовски и Гонзало Перез де Варгас, тука се и соиграчите од Рајн Некар Левен, Филип Талески и Гидеон Гвардиола, а Кире Лазаров кој го носи дресот на Нант ќе се соочи со клупските колеги Едуардо Гурбиндо и Давид Балагер.
Стојанче Стоилов и Мартин Поповски од Вардар ќе ги одмерат силите со Жоан Кањељас.
Нашиот селектор Раул Гонзалес за прв пат има шанса како предводник на Македонија да се соочи со Шпанија, репрезентација со која како ракометар има освоено бронзен медал на Олимписките игри во Атланта.
Во минатото против Шпанија немаме ниту една победа во пет меѓусебни дуели.
Натпреварот против Шпанија се игра во Вараждин, а почетокот е закажан за 20 часот и 30 минути.