Севилја и Рома се придружија на Јувентус, Манчестер сити, Реал Мадрид и Ливерпул во четврт-финалето во фудбалската Лига на шампиони.
Шпанскиот состав од Андалузија го елиминира Манчестер јунајтед по вечерашниот триумф на „Олд Трафорд“ со 2:1. Сите три гола на „театарот на соништата“ беа постигнати во второто полувреме пришто централна фигура беше Бен Једер.
Францускиот интернационалец беше двоен стрелец за тимот на Винченцо Монтела. Првиот шок за домашните фанови го приреди во 74 минута, го повтори и четири минути подоцна за еуфорија меѓу стотиците фанови кои допатуваа на Островот да ги бодрат нивните миленици. Ромелу Лукаку успеа на намали во 84 минута, но време за пресврт на „црвените ѓаволи“ немаше. Првиот меч на „Рамон Санчез Пискуан“ заврши без голови.
„Волчицата“, пак, го доби двомечот со Шахтјор благодарение на минималната победа на „Олимпико“ со 1:0. Стрелец на единствениот погодок за составот на Еузебио ди Франческо беше Един Џеко во 52 минута. Украинскиот состав остана со човек помалку на тревникот во последните десетина минути по исклучувањето на Ордетс што дополнително ја отежни мисијата на клубот од Доњецк кој славеше во првата средба со 2:1.
Четвртфиналниот октет во ЛШ ќе биде комплетиран утревечер со реванш дуелите меѓу Барселона и Челзи, односно, Бешикташ и Баерн Минхен. Воведниот меч од шпанско – англиската пресметка заврши без победник (1:1) додека бундеслигашот го декласира турскиот ривал со 5:о на „Алијанц арена“.
Лига на шампиони
Осминафинале, реванш мечеви
Манчестер јунајтед – Севилја 1:2 (0:0)
Рома – Шахтјор 1:0 (1:2)
Во заграда се резултати од првите средби
Утре играат
Бешикташ – Баерн Минхен (0:5)
Барселона – Челзи (1:1)