Шефовите на европските дипломатии вчера во Брисел изразија солидарност со Велика Британија за нападот со токсичен гас врз рускиот екс шпион Сергеј Скрипал и ќерка му Јулија и побараа од Русија да одговори на прашањата на кои Лондон бара одговор.
“ЕУ силно го осудува нападот против Сергеј и Јулија Скрипак во Салисбери во Велика Британија на 4 март 2018 година, напад во кој тешко беше повреден полициски службеник. Животите на многу граѓани беа под закана поради овој нелегален акт”, вели министерското соопштение.
Но, европските министри во соопштението не рекоа дека Русија е одговорна за овој напад како што бараа Британците. И покрај јасниот консензус помеѓу министрите дека Москва стои зад овој напад, обвинувањето беше испуштено поради грчкото противење.
Грчкиот министер за надворешни работи Никос Коѕијас го потпиша соопштението на ЕУ, но не дозволи Русија да биде обвинета за нападот се додека научниците од Меѓународната организација за забрана на хемиско оружје не завршат со истрагата за овој напад со токсичниот гас “новичок”, пишува денес европскиот портал ЕУОбзервер.
Коѕијас ги предупредил неговите ЕУ колеги дека не треба да се презема ваков чекор се додека за тоа не се добијат докази, изјавил грчки портпарол за ЕУОбзервер. Според портпаролот, во министерската сала не дошло до драма но дискусијата била жешка.
“Грците инсистирале велејќи дека не треба да се споменува Русија во соопштението на ЕУ, па била потребна одлучна акција на Шведска пред се, a и на балтичките држави, за да се дојде до заклучок”, изјавил за ЕУОбзервер Џонатан Ејал, британски експерт кој се повикува на свои извори во ЕУ.
Британскиот министер Борис Џонсон не побарал нови санкции против Русија поради нападот во Салисбери, но таков чекор може да се очекува доколку Русија одбие да соработува со британската истрага.
Писмото на Јункер до Путин предизвикува “гадење”
Досега нема реакции за грчкото одбивање во соопштението јасно да се каже дека Москва е одговорна за нападот, но Британците денес остро реагираат на писмото претседателот на Европската комисија (ЕК) Жан-Клод Јункер му го испратил на Владимир Путин за да му го честита новиот мандат на чело на руската држава.
Според Британците, писмото на Јункер не само што е премногу љубезно туку предизвикува “гадење” и никаде не го споменува проблемот со нападот врз Скрипал.
“Отсекогаш сум велел дека позитивните односи помеѓу Европската унија и Руската федерација се клучни за безбедноста на нашиот континент”, пишува Јункер и бара од Путин да помогне во повторното воспоставување безбедносна соработка помеѓу двете страни.
“Нашата заедничка цел треба да биде повторно воспоставување на пан-европска соработка за безбедност”, пишува Јункер и изразува надеж дека Путин ќе го искористи овој четврти мандат за да се оствари оваа цел.
Британскиот пратеник Ешли Фокс, кој ја води британската парламентарна група на Конзервативците во Европскиот парламент, изјави дека Јункер “му прави задоволство на човекот што е јасна закана за западната безбедност”. И додава дека фактот што Јункер никаде во писмото не ја споменува руската одговорност во нападот врз Скрипал предизвикува “гадење” кај Британците.