Шефот на грчката дипломатија Никос Коѕијас денеска треба да пристигне Скопје во прва посета на земјата, по преименувањето на аеродромот, што беше една од отстапките, кои македонската Влада ги направи во процесот на преговорите меѓу Македонија и Грција за решавање на спорот за името, објавени по првата средба на премиерите Заев и Ципрас во Давос.
Според најавите од МНР, Коѕијас и шефот на македонската дипломатија Никола Димитров е планирано да разговараат за позициите на двете страни, откако и Грција и Македонија си ги разменија нацрт-договори за решавање на името, за кои Димитров рече дека имаат разлики.
– Чесно е да кажам дека има разлики и се надеваме дека ако мислиме заеднички на една цел ќе успееме тие разлики да ги надминеме, нагласи Димитров.
Достоинствено решение за името, со почитување на идентитетот, без промени на Уставот е нешто што го бара македонската страна.
Премиерот Зоран Заев, потврдувајќи го пристигнувањето на грчката нацрт-спогодба во Македонија, нагласи оти тие се алатки, што можат да бидат од помош во процесот на преговори, но клучен елемент е нацрт-драфт-меѓународен договор што треба да дојде од медијаторот на ОН во спорот Метју Нимиц.
Заев посочи дека во македонската нацрт-спогодба има повеќе меѓународни формулации на вакви меѓународни договори затоа што формулациите во делот на името, употребата, широчината, идентитетските прашања, кодовите и слично, се уште се на маса за преговори. Тие се ставени во разни форми, како што се ставени и од грчка страна.
Димитров и Коѕијас на 30 март во Виена ќе имаат нова средба со посредникот на ОН во преговорите за името Метју Нимиц.
Откако шефот на грчката дипломатија откри дека нацрт спогодбата е испратена до Скопје, грчките медиуми, меѓу кои и „Катимерини“ и „Та неа“ ги објави петте имиња што се содржани во грчкиот предлог. Всушност станува збор за истите идеи доставени од медијаторот Метју Нимиц, односно имињата: Република Северна Македонија, Република Нова Македонија, Република Горна Македонија, Република Вардарска Македонија, Република Македонија (Скопје).
Преговорите влегуваат во клучна фаза
Според грчките медиуми по доставените предлози од двете страни преговорите влегуваат во клучна фаза.
Весникот „Катимерини“, анализира дека позициите на Атина во грчката нацрт спогодба се горе-долу познати и вклучуваат седум точки, а за три од нив постои договор, „за името (веројатно „Горна Македонија“), за акронимите и за иредентистичките наводи“.
Онлајн изданието на весникот „Прото тема“ пишува Грција очекува на следната средба на шефовите на дипломатиите со Нимиц, во Виена, да се извршат притисоци.
– Грчката Влада ја задржува надежта дека тогаш ќе ги се извршат долго очекуваните притисоци како од Европската унија и Ангела Меркел, така и од Обединетите нации преку Метју Нимиц, што веќе долго време и беа ветени на Атина, пишува „Прото тема“.
Претседателот на опозициската Нова демократија Кирјакос Мицотакис упати остри критики до актуелната грчка Влада, за политиката што ја води во однос на спорот за името.
– Во прашањето со Скопје, Владата потсетува на Вавилонска кула. Прашањето со ревизија на Уставот на соседната земја, го поставивме уште од прв момент како услов што не може да се прекрши за да продолжиме кон било кој друг разговор, вели тој и додава дека е премногу доцна за формирање национален фронт кога самата влада не може да формулира национална линија за еден толку критичен национален проблем.
Во пресрет на денешната посета, во изјава за МИА, портпарол на Стејт департментот укажа дека САД продолжуваат со поддршката и се надеваат на брзо решeние на долготрајниот спор со името.
– Се надеваме дека лидерите на Македонија и Грција ќе постигнат заеднички прифатливо решение во интерес на евроатлантските интеграции, економскиот просперитет, мирот и безбедноста во регионот, се вели во изјавата.