За попладневните часови е закажан телефонскиот разговор на Зоран Заев и Алексис Ципрас, по што двете страни треба да го известат специјалниот претставник на ОН Метју Нимиц во Њујорк . Потоа, се очекува премиерите на Македонија и на Грција да ги информираат пртеседателите на двете држави и лидерите на политичките партии..
Според грчките медиуми, со телефонскиот разговор меѓу Заев и Ципрас се очекува да се финализира двеценискиот спор за името меѓу Македонија и Грција. Двете страни се во трка со времето, пред Самитот на ЕУ и НАТО Самитот, за Македонија да може да пристапи кон НАТО и да се обиде да ги започне преговорите за пристапување со Унијата “ пишува Катимерини.
Весникот коментира дека иако грчките власти сакале да создадат впечаток во јавноста дека се чека само на одлука на властите во Скопје, комуникацијата преку диппломатските канали била постојана.
Според весникот договорени се измени во последен момент – а главна тема било прашањето за употребата на новото име. „Грција сакала да се користи erga omnes – на национално и на меѓународно ниво. Заев, пак, инсистирал на извесно исклучување така што сегашното уставно име да може да се користи во одредени случаи во земјата“, пишува Катимерини.
Исто така, се разговарало и за македонската припадност и јазик, за што според „Катимерини“ било најдено решение во договорениот текст со кое се прави јасна дистинкција со античка Македонија.
Повикувајќи се на свои извори, „360 Степени“ објави дека договорот се темели на сложеното име Република Северна Македонија кое ќе биде за севкупна употреба и ќе биде преведливо на сите јазици.
За сметка на тоа земјава добива чисто именување на јазикот како Macedonian. Во графата за државјанството ќе пишува Macedonian/citizen of Republic of North Macedonia.
Придавката Macedonian ќе може да се користи од нашата страна во етнокултурен контекст. По потпишувањето, договорот ќе оди на ратификација во македонскиот парламент по што Грција ќе даде согласност земјава да добие покана за прием во НАТО и датум за старт на преговори со ЕУ.