Дел од македонските пратеници кои се изјаснија позитивно за отпочнување на измените во Уставот за промена на името на државата се под 24 часовна полициска заштита за зачувување на нивната сигурност и безбедност, објави неделникот „Фокус“ повикувајќи се на неименувани извори во Министерството за внатрешни работи (МВР). Во текстот се наведува дека под полициска заштита не се само пратениците од опозицијата кои експресно беа исклучени од членство во ВМРО ДПМНЕ бидејќи го поддржаа предлогот на македонската Влада туку и пратеници на владеачкото мнозинство.
„Дел од пратениците сами побараа заштита, а за дел одлучи полицијата“, велат извори од МВР за неделникот без притоа да наведат за колку точно пратеници станува збор од вкупно 80. колку што гласаа „за“ почеток на уставните измени во рамки на Договорот од Преспа со соседна Грција.
Премиерот Зоран Заев веднаш по гласањето во петокот доцна вечерта и вети на групата од осум пратеници од коалицијата предводена од ВМРО ДПМНЕ дека ќе бидат заштитени заедно со нивните семејства.
Откако предлогот на Владата за отпочнување на уставните измени го доби потребното двотретинско мнозинство во македонското Собрание, на социјалните мрежи се засилени пцовки, навреди и закани кон пратениците кои гласаа „за“. На Фејсбук профилите на самите пратеници се оставаат вулгарни пораки, а во една од нив се повикува на ликвидација на седумте пратеници на ВМРО ДПМНЕ, кои во петокот вечер беа исклучени од партијата, со објавување на некролози од нив.